Khualkhua atanga Khawzawl damdawi in pantu damlo leh a awmpuitu a duh apiang tana thlenna tur khualbuk – Patient Attendants’ Shelter (PAS) Khawzawl Dinthar Venga sak chu Nilaini khan deputy chief minister Tawnluia’n a hawng.
Khualbuk sakna tur hi Sub-Hqrs. MHIP Khawzawl-in an ram an pe a, deputy chief minister hian an chungah lawmthu a sawi. Mipuiin kan inhman tawm vantlang building leh bungruate a chhe duh deuh bik nia a hriat thu sawiin, vantlang thilte neitu thinlung pu chunga enkawl tur leh dim thiam turin a chah.
Patient Attendant’s Shelter Khawzawl hi UD&PA hnuaia Deendayal Antyodaya Yojana – National Urban Livelihoods Mission (DAY-NULM) fund Rs 53,35,090 senga sak niin, 2021 September 13 khan bul tan a ni a. Sub-Hqrs. MHIP Khawzawlin a hmun tur ram an pek bakah building sak hna hi an thawk a, inremna siam angin a enkawl chhunzawm zel hna pawh an thawk dawn a ni. He building hi Zopa chhiara chhawng thum niin, chhawng khat zau zawng hi square feet 1250 a ni a, reception counter, councelling room, kitchen, lounge, recreation room, caretaker room, dormitory mi 10 riah theihna khum 10 awmin room tinah hian toilet dah vek a ni. Mutbu leh eirawngbawlna hmanruate thlenga dah a nih bakah solar heating system, solar inverter leh thil pawimawh dangte he building-ah hian a awm bawk a ni.
Shelter for Urban Homeless (SUH) inkaihhruaina dan dinglai angin a enkawl zui zel nan kum 5 chhung operation and maintenace fund (O&M fund) khum khatah kum khat atan Rs. 12000 zel pek thin a ni ang.
Damlo kalpuitute riahbuk siam
