Dampa bial by election atan Congress candidate John-a

Dampa bial by election atan
Congress candidate John-a
Dampa biala MLA by election neih turah Congress party official candidate atan MPCC vice president John Rotluangliana ruat a ni.
MPCC president Lal Thanzara chuan Nilaini khan Dampa biala MLA by election neih turah an party official candidate hi a puang a. MNF-in an rawng huai an ser a, an ni pawhin an vice president an ser ve dawn tih a sawi.
Dampa bial hi Phuldungsei bial tih a nih lai, kum 1983 khan PC sawrkar laiin by-election ah Congress candidate Pu Liansuama thlantlin a ni tawh a, a kum leh 1984 ah general election a awm a, Congress party chuan seat 30 awmah seat 20 la in an sawrkar tih a sawi a. Tun tumah pawh an candidate hi Pathian-in Congress a kaihthawh lehna hmanrua a nih an beisei tih a sawi a ni.
“Pu John Rotluangliana hi Dampa lama kan Congress hruaitute duh rawn, an lungrualna em em a ni a, a ni kan candidate tur hi kan lawm em em a ni,” a ti.
Congress candidate John Rotluangliana chuan, by election chu ruling party chanpuala ngaih thin ni mah se, ruling ho an che chhe em a, belh tlakah an ngaih a ring lo tih sawiin, “ZPM candidate chu lo tling ta pawh ni se, eng nihna mah an pek ka ring lo. Nihna pawimawh zawng zawng, joint secretary thlengin an inpe zo vek tawh a, eng chanvo mah pek leh tur an nei tawh lo,” a ti.
Tunhma pawhin MLA-te boral avangin by election a lo awm tawh thin a. Election Commission-in inthlan hun a puan hnuah candidate an puang thin a ni ngai tih sawiin, “Tun tum by election kalphung thar hnuaiah chuan engti teh reng nge maw ni, candidate puan an hmanhmawh em em a, mipui an ti phawklek zo vek.
Congress candidate min thlangtling a nih chuan, 2028 MLA inthlanpuiah Congress party-in hnehna a chang ngei anga, hemi atana meichher lo chhi alh hmasa turin Dampa bial mipui ka sawm a ni,” a ti. Engemaw avanga Congress party atanga chhuak ta zawng zawng chu lo kir leh vek turin a sawm tih a sawi a ni.
“Pathian khawngaihna leh mipui zarah, tun sawrkar dik lohna bei let tur hian MLA-ah min thlantlin ngei ka beisei a. Dampa-ah hian Congress MLA ni turin ka lo kal dawn loa, Dampa mipui MLA ni turin ka lokal dawn a ni,” a ti.