Dampa bial-in BJP in thlantlin chuan hmasawnna pek kan tiam – Union minister

Dampa bial-in BJP in thlantlin
chuan hmasawnna pek kan tiam
– Union minister
Dampa bial-in BJP candidate an thlantling a nih chuan hmasawnna pek let kan tiam a, Prime minister-in chu chu min tiam a ni, tiin Union minister Kiren Rijiju chuan a sawi.
Zan khat riaka Dampa bial by election neih tura campaign-a lokal Union minister of Parliamentary Affairs & Minority hian Ningani khan Reieka vantlang inkhawmah Dampa bial hmasawnna tura lehkha thehluh hrang hrang, NGO leh pawl hrang hrang atangin a dawng a, artificial turf siamna, link road laihna, Reiek atanga Lengpui inkalpawhna kawngpui siam leh pawl mamawh zawng zawng tih hlawhtlinna tur leh an thil dil an hmuh theihna tura a ngen let ve thung chu, Dampa biala BJP candidate an lo thlangtlin a ni tih a sawi a. Hei hi an tih hlawhtlin chuan an duh leh mamawh chu an ti zel dawn tih a tiam thu a sawi.
“Hmarchhak mi zingah MP ni rei ber ka ni tawh a, NE state hi ka enkawl turin mawhphurhna min pe a, Prime minister-in min tiam angin Dampa bial hmasawnna turin BJP MLA kan neih chuan, Reiek khuaah ngei hian ka rawn kal leh dawn a, Reiek khua in kan mamawh hrang hrang hi a taka tih hlawhtlin vek a ni dawn tih ka tiam che u a ni,” a ti.
BJP MLA K Hrahmo chuan, Dampa bial mipui chu kum nga ni lo, kum 10 ni lo, kum 3 chiah BJP enchhin turin a ngen tih sawiin, “MLA-ah BJP candidate in thlangtling a nih chuan Dampa bialah enge lo thleng a, enge in hmuh tih a hriat dawn. Chuta in duh lo a nih chuan kum 2028 ah in paih thla leh mai dawn nia,” a ti.
Amah leh Dr K Beichhua chu BJP MLA an ni a, an bial tan hma an lakna kawngah a hrechiangtu leh Delhi naka zentute an ni tih K Hrahmo hian a sawi a. “Tuna Union minister hi min duhsaktu, kan mamawh min petu a ni. Induhsak hi sual a ni lo, Dampa bial mipui hian central duhsakna kan channa turin a dawhthleng kan siamrem dik a ngai,” a ti.