Dan bawhchhiaa expo buatsaih luih
titawp turin thuneitute ah kan thlen
– MIMA
Aizawl Lammuala expo neih chu sawrkar dan an bawhchhia tih hailan a nih tawh hnu pawha thuneitute atanga tihtawp tumna a la awm lo chu an hrethiam lo tih sumdawng intelkhawm pawl chuan an sawi a. Thuneitute hnenah titawp turin an thlen tih an sawi.
MIMA Gen. Hqrs. thuchhuak chuan, expo buatsaihtute hian dan leh dun an ngaipawimawh lo leh advertisement an tar angin an kalpui lo hle nia an hriat thu a sawi a. Central Consumer Protection Act 2019 Section 89 sawi angin, expo hi advertisement-ah leh banner-a an tarah chuan ‘international expo’ tih a nih laiin, international a nihna hmuh tur leh document phawrh tur an nei loa, act tarlan tak bawhchhiain ‘misleading/false advertisement’ a ni tih a sawi.
Food safety licence nei loin Delhi Kitchen tih hmangin ei leh in siam a ni tih a sawi a. He license hi ni 20.02.2021 a thi tawh niin, hei hi FSSAI dan kalh a ni tih a sawi a ni.
MZP leh MIMA-in ILP an neih dan an endiknaah ILP neilo/ thi tawh 36 man an ni a, police ah pek an ni tih a sawi bawk.
‘Hetianga dan bawhchhiaa vawiin thlenga expo buatsaih hi tih tawp a la nih loh avangin MIMA leh MZP chuan an ngaithiam lo hle a, heti chunga expo hi hawn zel a nih a, buaina emaw harsatna emaw an tawk a nih pawhin MIMA leh MZP chuan mawh an phur lo ang,’ thuchhuah chuan a ti a. He expo hi a rang lama titawp tura ngenna Aizawl bawrhsap leh Aizawl Police Station-ah MIMA hruaituten ziakin an thlen tih a sawi a ni.
Dan bawhchhiaa expo buatsaih luih titawp turin thuneitute ah kan thlen – MIMA
