Dan bawhchhiate hrem theih dan

Inthlan hun lai bawra inthlan kaihhnawiha dan awmsa bawhchhiate chunga hremna lekkawh theih dan hrang hrang a awm.
Election hotuten dan dinglai an tarlanah, Section 505 of IPC ah chuan, mi tupawhin thudik tawk lo hmanga midang, pawl leh khawtlang fuihpawrh emaw innghirnghona thlen thei zawng emawa thu a tihdarh chuan kum 3 thlenga lung in tan bakah sumfai chawitir emaw a pahnih hmang emawa hrem theih a ni.
Section 125 of the RP Act 1951 ah inthlan chhunga mimal leh pawl inhmelmakna thlen zawnga hma la chu hrem theih a ni a. Section 153A of IPC ah kohhran, hnam, pian leh murna, chenna leh tawng hmanga inhmuhthiam lohna leh innghirnghona thlen thei zawnga thu thehdarhtu chu hrem theih a ni.
Section 153B of IPC ah ram leh hnam inpumkhatna tichhe zawnga chet latu chu hrem theih a ni a. Section 295A of IPC ah
sakhuana leh rinna insawichhiatsak zawnga khawsa leh hma latu chu hrem theih a ni. Section 298 of IPC ah tum reng vanga mi sakhaw vawn leh rinna insawichhiatsak chu khap a ni bawk.
Section 123(3A) of RP Act 1951 hnuaiah dan bawhchhiatna – (3A) candidate emaw a agent emaw remtihnaa midang hmang tangkai a, sakhuana, hnam, khawtlang leh tawng hmanga inhuatna emaw inhmelmakna siam thei zawnga khawsa emaw candidate dangte rilru hliam zawnga khawsa emaw chu hrem theih a ni a. Section 94 of the RP Act ah vote thlak chungchangah mi vote hriatsak emaw thuhretu insiama midang vote hriatsak emaw phal loh a ni. Section 171 C of IPC ah zalen taka mi vote thlak tur tihbuai emaw an ngaihtuahna tihbuai tum zawnga khawsa emaw chuan inthlan dan a bawhchhia tihna a ni.
Section 171 G of IPC ah tu pawhin candidate beih nana a dik tawk lo tih hrereng chunga inthlan result nghawng thei tura thu vawrh darh emaw thuchhuah siamtu emaw chu sumfai chawitir theih a ni.
Section 126(1)(b) of RP Act 1951, Section 126(1)(b) of RP Act 1951 in silence period (vote thlak hun tawp atanga chhiarleta darkar 48 chhung) a sawi chhungah tumahin cinema, TV leh hmanraw dang hmanga election chungchang thu tihchhuah khap a ni a. Silence period chhung hian opinion poll lak pawh khap a ni.
Section 126 A of RP Act 1951 leh Section 126A RP Act 1951 chuan vote thlak phase hmasa ber tan atanga phase tawp ber inkar chhungin exit poll siam leh result puanchhuah a khap a. Section 471 of IPC chuan tu pawh suahsualna rilru pua document emaw electronic record dik lo tih hrerenga hmang lui chu document siamchawp hmang ang chiaha hrem theih a ni, tih a ni bawk.