Mamit leh a chhehvel paltlanga dan loa kuhva rah phur thinte chu an man a nih chuan an chungah eng pawh thleng se, mawh an phur dawn lo tiin, Mamit Kuhva Chingtu Pawl chuan an sawi.
Mamit Kuhva Chingtu Pawl (MKCP) thuchhuak chuan, Mizoram sawrkarin tualchhunga thar kuhva rah hralhna kawnga harsatna awm mekah Burma atanga dan loa kuhva ro lut thin tihtawp tuma hma a lakna an thlawp a. Kuthnathawktuten an thawhrimna rah senga, state economy chawikang thei khawpa tam kuhva an thar mek leh chhim leh hmar, chhak leh thlanga an chin pun mek lai a, harsatna thlen thei zawnga ramdang kuhva ro, dan loa tawlhru thinte avanga harsatna an tawk reng leh hetiang tih ching man tur an la awm fo te, mahni hlawkna uma rem leh rem loa lirthei hmanga phurkual duh an la awm thin chu vanduaithlak an tih thu a sawi.
Kuthnathawktute harsatna tawh chhanchhuak tura Hachhek Bial Kuhva Chingtu Cooperative Society, Bilkhawthlir leh Vairengte Kuhva Chingtu Cooperative Society hmalakna an thlawp tih sawiin, ‘Sawrkar leh danin a phal loh tilui tlattute hian engpawh tawk se, anmahni cho chhuahah kan ngai a. Mamit leh a chhehvel paltlanga dan loa kuhva ro phurhkual kan remti loa, man chhuah an nih chuan an chungah engpawh thleng se, kuthnathawktuten mawh an phur loang,’ MKCP chuan a ti.
MKCP-ah hian chhungkaw member 300 vel an inziaklut tawh a, Tun dinhmunah kuhva hmun tin 1305 vela zauah chingin, kuhva kung 964368 an enkawl mek a; kum 2023- 2024 chhung khan kuhva thar hralhna atangin cheng nuai 60 vel hralhchhuak angin an inchhut tih an sawi. Harsatna a awm lo a nih chuan kuminah kuhva hralh hi chuan cheng nuai 150 vel kai tura beisei a ni tih an sawi.
Dan loa kuhva phur kual man chhuahte chungah chet nat tum
