Dan rual lohin Sinner a champion

Pathianni chawhnu khan Australian Open 2025 – mipa final khelh a ni a. Final hmuhnawm takah dan rual loha khel tha Jannik Sinner chuan set hloh lova Alexander Zverev hnehin a champion nawn leh. Final-ah a tlawm leh tak vangin Grand Slam-a la champion lo Zverev tan tha a tul leh thin.
Final a inhmachhawn Jannik Sinner leh Alexander Zverev te hi tunhnaia khel tha dun tak mai an ni a, final hmuhnawm tak an pho lang tura beisei an ni. Beisei lawk ang ngeiin inkhel a hmuhnawm a, beisei ai maha Sinner a chungnun tak vangin beisei phak lovin final a tawp ta thung. Sinner leh Zverev te hi set khatna tir lamah an inhnehtawk hle a, break nei thei an awm lawk lo. Game thum ve ve an lak hnuin Sinner-a’n break pawimawh tak a nei a, a serve a hum zui bawk vangin rin aia awlsamin set a la.
Set hnihnaah inkhel a hmuhnawm leh zual a, tie-break khelh a ngai ta hial. Tie-break-ah Sinner a chungnung zui leh a, set a la nawn leh. Champion lai leh champion tura rinkai zawk Sinner-a’n set a lak zawn vangin Zverev tan thil a harsa leh zual a, champion tur a rin thiam ruak tawh. German second seed Zverev hian inlehthalna lian thlentir tum in tan khawh chiam thin mah se ball vaw na, khawi ball kalna apianga lo awm hman zel leh dik leh na taka vaw let tura insiamrem hman zel Sinner lakah tisual hmasa zawk a ni zel mai si a, tih theih a nei tlem hle. Chak a mamawh em em laiin a serve a hum zo lo zui leh a, dinhmun chhe zual zawkah a tlu lut. Khel tha em em mai Sinner hian chak theihna hun tha a neih chu a bawhpelh duh lova, inkhel hmuhnawm takah 6-3, 7-6 (7-4), 6-3 in hnehna a chang a, ropui takin a champion nawn leh ta a ni.
World No. 1 Jannik Sinner hi a khel tha tluang tak zet. US Open-ah a champion hnuin Six Kings Slam leh ATP Finals-ah a champion a. Ram leh ram inelna lian Davis Cup-ah Italy a champion pui bawk. Australian Open-ah a champion zui leh tak bawk vangin tunhnaia a khelh hnuhnung vawi 79 atangin vawi 73 zet hnehna a chang thei. Sinner hian a service na em em a, hah thei lo ang maia fit in a tlo em em a, a ball vuak a nain a dik a, a return a tha em em zel bakah a huaisen nek bawk sia a, a khingpuiten an chai hleithei meuh lo a ni ber mai. Zverev ngei pawh hian Sinner lakah a khel chhia a ni hran lo. Sinner that lai ber a nih miau vangin a tih that zawng zawng pawh Sinner thatzia tifiahtu maiah a chang zo ta zawk a ni.
Grand Slam-a a champion na hmasa ber Australian Open-ah champion nawn leh tak vangin Sinner hi kum 2000 hnu lamah Grand Slam-a champion na hmasa bera champion nawn leh thei hmasa ber a ni a. Tennis player ropui Roger Federer leh Rafael Nadal te hnuhnung a zui. Hneh theih loh ang maia inlan a, ‘|hachungchuanga’ an tih mek Sinner hi Grand Slam-ah kum 23 mi ni chungin vawi thum a champion ta a. Inhliam lova a khel tha tluang zel thei a nih chuan Grand Slam-ah a champion belh teuh ngeiin a rinawm.
|ah a tul leh thin
Player tha pawl tak ni reng chunga Grand Slam-a champion harsat Alexander Zverev chu Grand Slam final-ah a vawi thumna a tlawm leh ta a, atan champion zawh loh vangin tha a tul leh thin.
Olympic leh ATP Finals champion hlui Zverev hi US Open 2020 leh French Open 2024 final-ah a lo tlawm tawh a. An intum tawh vawi rukah vawi li a hneh tawh Jannik Sinner chu inkhel pawimawh tak Australian Open final-ah a hneh zo lo leh a, Grand Slam title a la nghakchhuak zo lo. Final-ah a lungthu kim nana tlawm Alexander Zverev hi Open Era-ah Grand Slam final an khelh hmasak pathuma tlawm vek parukna a ni. A khelh that lai a nih vangin champion beiseina nei sang viau mah se a cho loh val Sinner chuan a beiseina chu sarah a zam raltir leh ta rih a. Kum 27 mi Zverev hian Grand Slam champion ni turin a nghah leh rih a ngai dawn.