The Mizo Marriage and Inheritance of Property (Amendment) Bill, 2026-in titi a siam a, miin an sawi zui luih luih a ni ber. February ni 24-ah House-ah an pass a, ni 27-ah pawh mipuiin an la sawi. Mizoram chief minister pawhin a la sawi.
The Mizo Marriage and Inheritance of Property (Amendment) Bill, 2026 hian titi a siam na a, miin an sawi zui nasa viau na a, an sawia hi a dan chhunga mi a ni lo. Mizoram chief minister leh mipuiin a dan chhunga mi ni lo an sawi a ni ber.
Mipuiin an sawi zui lai hi Mizo hmeichhiain hnam dang an neih chuan Mizo an ni tawh lo tih chungchang a ni ber a, mahse The Mizo Marriage and Inheritance of Property (Amendment) Bill, 2026-ah hian chutiang a lang lo.
Social media-ah an khel zui luih luih a, hnam dang pasal nei pawh ni se Mizo a nihna a bo thei lo tih ngaihdan neite titi a ring hle.
Chief minister, Assembly House-a house leader-in he bill a put luh khan “Kan hmeichhiate’n hnam dang an neih khan an Mizona a tawp tawh dawn a ni,” tiin a sawi a, chu chu mipuiin an khel zui niin a lang.
The Mizo Marriage and Inheritance of Property (Amendment) Bill, 2026-ah chutiang a awm lo a, Mizo tih hrilhfiahnaa a inziah dan chuan, pianpui Mizo te, an pate Mizo tribe an nih chuan tih te, dan hmanga falak an nih chuan tih te a ni. He dan siamthatin innei a huam chin tur pawh Mizo leh Mizo inneihna leh a mipa zawk Mizo a nih chuan tih a ni.
February ni 27 khan hnam dang pasala neih chungchang hi house leader-in a sawi leh a, “Kan Mizo hnam dan hian a sawi chiah lo na a, a hnawl tlat a ni,” a ti. Hei hi ennawn a hun tawh em tih ngaihtuah a tha a tih thua chhunzawmin, a dana awm lo bawk a sawi leh.
Khawvel kal dan enin hnam dang nei an pung dawn niin a sawi a, “Kan rilru pawh hi thliarkar rilru pu lo deuhva kan awm hi a ngai ve tawhin ka hria a,” a ti.
February ni 24-a an dan siamthatin social media-ah sawi zui a hlawh thu a sawi a, Mizo hnam dan ennawntu committee an awm a, anni rawt angin tun tum session-ah hian sorkarin The Mizo Marriage and Inheritance of Property (Amendment) Bill, 2026 hi a pu lut mai niin a sawi. A bill put luhah hian Statement of objects and reasons tih phekah he dan siamthat nana rawtna thlentute a tarlang a, Mipa Upa Pawl an lang; ‘Mipa Upa Pawl (MUP)’ tiin a inziak.
House leader hian Lawngtlai West bialtu C Ngunlianchunga resolution put luh ‘Mizote’n hmeichhia tia kan koh thinna hi ‘minu’ tia thlak ni rawh se’ tih sawihonaah February ni 24-a The Mizo Marriage and Inheritance of Property (Amendment) Bill, 2026 an pass tawh chungchang hi a sawi a ni. He resolution pu luttu hian hmeichhia tih chu minu tia thlak ni se tiin a rawt a, mahse house hian an pass ta lo.
Dan siamthata lang lo sawi zui zel
