‘Dar 10’ film tlangzarh dawn
Zotlang Branch K|P-in an Kohhran biak in sak puala Kristian film an buatsaih ‘Dar 10’ tih chu August ni 29 (Zirtawpni) hian an tlangzarh dawn a, Lersia Play-ah a en theih ang.
He film-ah hian Tthil thalo hi mi zawng zawng hian engvangin nge kan tih loh? Midangte tihnat pawh pawi sa lo khawpa duham hian mihringte hi kan awm chang a awm fo mai. Kan thiltihte hi ngaihdan kan neihte atanga rawn piang kan ti thei awm e. Thlemna chu mitinin kan dawng vek a, engvangin nge mi thenkhat chiah a hneh thin? Thlemna kan do zawh loh dan a inan loh ang bawkin kan thlemna dawn te a inang lo bawk. Mihring tinte chak lohna lai hi, kan seilen danina a hrin a ni thei mai ang em? Kan seilenna mai piahlamah kan chhehvela thil thlengte hian kan nihna a siam a, kan ngaihdan neihte leh kan thiltihte a nghawng thin a ni mai lo maw? Kan nuna kan tawn tawh leh kan tawn mek atanga kan thil hmuh leh hriatte chuan vawiina kan chhia leh tha hriatna a nghawng a, chumi hmang chuan thil tamtak kan puitlina, chu chuan kan nakin hun a nghawng leh thin a ni mai lo maw? Tihte hi he film-in tarlan a tum leh a thu laimu a ni.
Hmaa te chhungkua chu Mizo Kristian chhungkaw pangngai tak niin an lang a. An fapa Zorama chu hna zawng mekin mi hausa tak Rina fapa Sanga tuition pein a inhlawh a. A nau Rinengi chu college kal lai, mahni zirlai ngaihsak aia tunlai thil a ngaihven nasa zawk a ni. Class-a kal aiin café-ah hun a khawh ral fo thin a ni.
Hmaa leh Ziri te chu nu leh pa fel tak niin lang mah se an fapa Zorama’n an chhungkaw nun a chhui kirin an nupa tawngkam kauchhehin an fateah rualawhna nasa takin a lo tuh tih a lang chho a. Rina’n Sanga pass an lawmnaa an hnuaia thawk tura a sawm pawhin Zorama chuan dan kalh thil an tiru tih hre reng chungin an hnar lem lova. An chhungkaw khawsak pawhin hma a sawn chak hle a. Kum hnih chhungin in nuam zawk leh awmpui pahnih lai neiin an khawsa thei ta a.
Rina chu a sum chevel atangin man a ni a; mualpho takin a tang a. Zorama’n tan ina a tlawh laia an inbiakna atangin tan ina tan tirtu chu Zorama a ni tih a hrechhuak a. Zorama chu inthiam lohna nei lem lovin Rina lo thawh thin chu a chhunzawm a. A mizia a thlak nasat tak avang leh a hausakna a chapopui tak em avangin a ngaihzawng Sangpuii chuan Kristian chhungkua dinpui ngam lovin, an inthen a. Zorama chuan a nau Rinengi tan dawr a hawn sak a; a nu leh pate’n rinhlelhna chang an hre lova, ngaihtha taka an awmlaiin Rina nupuiin Zorama lakah phuba lak dan a lo ngaihtuah reng chu bawhzuiin, Zorama chhiatna turin hma a lak ve tak dan velte tarlan a ni.
‘Dar 10’ film tlangzarh dawn
