Tuipui ‘D’ Darzo kai lei dawh tum mekah hna tan turin kumin August hian tih fel ngai an peih hman an ring tih Border Roads Organization (BRO) hotute chuan an sawi.
Commerce & Industries minister Dr R Lalthangliana chuan Thawhtanni khan Rajya Sabha MP K Vanlalvena nen New Delhi-ah BRO director general Rajeev Chaudhary kawmin, Lunglei leh Lawngtlai district inkalpawhna atana pawimawh Tuipui ‘D’ Darzo kai lei dawhna tur cheng vaibelchhe 91 chuang saction awm tawh an sawipui a. BRO hotu hian a tul angte an buaipui fel tawh thu leh thuneitu sang lamah an thlen mek thu sawiin, August kar hmasa ber a ralhma in engkim an tihfel theih a inrin thu a lo hrilh.
Thingsai – Pangkhua inkalpawhna defence road BRO-in a laih mek chu km. 21.38 hmabak a la awm tih minister hian a thlen a. BRO hotu hian national highway single lane angin an chhunzawm tur thu leh hemi atan hian Ministry of Defence chuan cheng vaibelchhe 111 a ruahman thu hrilhin, thla 6 chhungin DPR peihfel a, working season tharah hna thawh tan hman tumin an inruahman thu a sawi a ni.
Ministry of Home Affairs hnuaia Department of Border Management secretary Atal Dulloo chu Dr R Lalthangliana hian a kawm a. Kawrpuichhuah Integrated Check Post tihpuitlinna tura sum ruahman tawh cheng vaibelchhe 552 chu central cabinet pawmpui tura chhawp chhuak thuai turin a nawr a. Atal Dullo chuan kar hnih vel chiah tuna a hna hi a la thawh avangin a la thar deuh thu minister hi lo hrilhin uluk taka a lo zirchian tur thu leh a theih anga ranga lo bawhzui a tum thu in a lo chhang.
India leh Myanmar insumdawn tawnna hmunpui Land Custom Station Zokhawthar leh Zorinpui chu India rama LCS project 20 thlan zinga tel a nih avangin a pawimawh hle tih sawiin, Border Management secretary hnenah hian hemi atana detailed project report siam chu tih thuai a ngai, tiin, a rang thei ang bera buaipui turin a ngen.
Darzo Kai lei dawh tan turin August ah tihfel theih inring
