David Beckham, kum 51, pualin Hollywood Walk of Fame-ah arsi an hawng tawh a, walk of fame-a arsi 2,849-na a ni. Beckham puala arsi hawnnaah hian a nupui Victoria Beckham leh an fate pathum Romeo Beckham, kum 23, Cruz Beckham, kum 21, leh Harper Beckham, kum 14, te pawh an tel a, an fapa upa, chhungkaw lak atanga inlahrang ta Brooklyn Beckham leh a nupui Nicola Peltz te erawh an inlan lo.
David Beckham chuan, “Ka chhungte chungah hian lawmthu sawi tur ka ngah hle mai, ka nu leh pa leh ka farnu te pawhin ka suangtuahna ka tihpuitlin theih nan min support reng thin. Victoria, ka nupui duhawm tak, kum 30 dawn kan innei tawh a, a tel lo chuan ka kawng zawh hi ka puitlin thei lo ang a, nuam pawh ka ti hek lo ang. Ka fa duhawm tak tak te pawh hi tuktin khum atanga phur taka ka thawh chhuah thinna chhan an ni.
“Zep lohah chuan ka hnuk a ulh dawn tlat mai. Fate u, engtikah emaw chuan he hmunah hian ka tu-te in la rawn hruai ngei ka beisei a, chutih hunah chuan mipa naupang thil ropui tak thlen tuma hmachhawp nei thin chanchin hi inla rawn hrilh thin dawn nia. I zavaia inchhuan theihna tur ka siam hi ka hlawhtlinna ropui a ni chiang e. In chungah ka lawm tak zet a ni. Ka hmangaih che u, ka lawm tak zet e,” a ti.
England football captain te pawh lo ni tawh, a vanglaia khawvel footballer hriathlawh ber te zinga mi, football a chawlh hnuah pawh a chanchin miten an la ngaihven chhunzawm tak zel David Beckham puala arsi hawnnaah hian a thianpa Hollywood star Tom Cruise leh Robbie Keane te pawhin an telpui a ni.
David Beckham pualin Hollywood Walk of Fame-ah arsi an dah ta
