Assembly Budget Session neih zawh takah ruling leh eptu lam thu inchuh a awmin debate-ah chuan an hneh a, vote-ah an hneh thin lo niin MNF MLA Er R Rohmingliana chuan a sawi.
Zirtawpnia MNF office, Mizo Hnam Run inkhawmah Thorang bialtu MLA Er R Rohmingliana chuan 9th Mizoram Assembly Budget Session report pein, tun Budget Session chu quiz ni ta se, MNF MLA-ten an chhan dik nasa anga, ZPM MLA-ten an chhang dik lo nasa hle dawn tia sawiin, MNF member Pu Lalrintluanga Sailo resolution putluh, ‘Mizoram sawrkar hian MSSSB thiah a tum hi ennawn ni rawh se’ tih leh, ruling lam putluh ‘Mizoram sawrkarin ni 100 chhunga a thawh hi ropui kan ti’ tihah debate-ah chuan an hneh a, vote-ah an hneh lo tiin a sawi. Stamp Act amendment 3% a tihsan chu MNF chuan an duh loa, sang over an tih thu a sawi.
Sawrkar duh vang ringawta Zoram chhe lailet der anga inpuh chu sim a ngai, tiin, thangtharte moral tihchhiatna a ni tih a sawi. “Dawt sawimam tum hi sim tawh ang u. Hniak phawi map loa dawt sawi House leader kan nei kha a zahthlak a. Kan Mizo pui IR police-te ‘kan ta a ni lo’ tihte kha a pawi. Home minister-in House-ah jail tangte a sawi dan pawh kha a nuihzatthlak hle,” a ti.
MNF sawrkarah CM-in adviser pahnih a nei a, ZPM sawrkar thar chuan inrenchem sawi reng siin CM-in adviser panga a nei a, sawi loh ang zelin an awm tih Er R Rohmingliana hian a sawi.
“Sawrkar tharah mipuiin beiseina sang tak nen an thlir thup a, hmunphiah chungchangah a chingtute an tibeidawng nasa hle. Cheng vaibelchhe 200 chiah thlai thar lei nan budget tharah an dah a, an flagship programme berah an dah tlem hle. MNF sawrkar hnutchhiah thlai thar lei nan cheng vbch. 110 leh health care-ah vbch. 40 hi kan hotute kutchhuak vek a ni,” a ti.
Mitthi ruang phurh nan vbch.5 leh old age pension Rs. 100 atanga 1000 ah an tipung erawh a lawmawm tih a sawi a. Gender budget a hrana an dah chu central-in ti tura a tih vang a ni, tiin, sawrkar tirhah research team-te duansa ang veka kal tur angin an insawi a, tute nge research team te chu hriat an chakawm hle tih a sawi bawk.
Debate-ah kan hneh a, vote-ah kan hneh thin lo – Er R Rohmingliana
