December thlaah Messi an ti leh tawh!

December thlaah Messi an ti leh tawh!
India ram Kerela state-a Lionel Messi telna world champion Argentina rawn inkhelh tur thulh a nih thu puan a nih hnuah India leilunga Messi telna team chahluh a nih tur thu heti lam buaipuitu promoter lar Satadru Dutta chuan puang ve lehin, December ni 12 khian Kolkata khawpuiah tour an tan tur thu an nemnghet.
Promoter Satadru Dutta chuan Argentine superstar Messi leh a pawlte’n India leilunga match thum an khelh tur chu a hmingah ‘GOAT Tour of India 2025’ an vuah thu leh football atchilh khawpui Kolkata ngei chu Messi ke nghahna hmasaber tur a nih thu a sawi a, chu ta tangin Mumbai leh New Delhi lama an kual tur thu a sawi.
Argentina great leh a hruihruai team lo zin hian December ni 15-ah Prime Minister Narendra Modi chu a chenna inah an hmu dawn a, hei hi tour kharna a ni nghal ang.
Kum 2011 khan Salt Lake Stadium, Kolkata-a Argentina leh Venezuela-te’n FIFA friendly match an khelh tumin Argentine great hi India leilungah a rawn inkhel tawh a, tun hi kha mi hnua Messi rawn inkhelh leh vawi khatna tur a ni.
Dutta chuan, “A nemnghehna ka dawng tawh a, official-in social media-ah ka tarchhuak nghal a; amah, Messi ngei pawhin he thu hi August ni 28 atanga September ni 1 inkar chhungin tour programme kimchang leh official poster nen a la rawn post ve dawn a ni,” a ti.
Kumin kumtir lam khan Dutta hian he tour atana a rawtna thlen turin Messi pa a lo hmu tawh a; February ni 28 khan Messi ngei hi a chenna inah lenchilh lehin, India rama tour kalpui chungchang hi minute 45 chhung an sawi dun tih sawiin, “Kan ruahmanna siamte ka hrilhfiah a, kan duh pawh chiang takin ka sawi a; ka thu thlen chuan a hneh ve hlein a lang a, lo kal a titlu ta hial a ni,” tiin Messi a dawr dan a sawi.
Messi team-ah hian Inter Miami lama a team-mate rualkhat – Rodrigo De Paul, Luis Suarez, Jordi Alba leh Sergio Busquets-te chu tel ngei tura ngaih an ni phawt a, mahse, Dutta ber hian Messi bak midang hming a sawi duh rih lo!
Messi hian a tlawh khawpui tinah naupangte hmaichhanah a pawl dawn a, Indian footballer chhuan thar lo chhuak turte tan kawng a rawn sial dawn a ni!
An ruahman dan chuan, December ni 12 zanah Kolkata khawpui a lut ang a, ni hnih chamin, tour-a khawpui pakhata hun a hman rei ber tur a ni ang.
December ni 13-ah chuan zing lamah mi hrang hrangin hmuhna hun an nei thei dawn a, a hotel Taj Bengal-a meet-and-greet event bakah hian special food leh tea festival lamah hun hmanpui leh a ni ang.
Dutta chuan an khualtha tur chu Argentine herbal tea ngaisangtu a nih avangin Argentine leh Indian Assam tea lo chhawpsak an tum thu sawiin, food festival lamah chuan Bengali sangha chi hrang hrang bakah chithlum lam an uar tur thu a tarlang tel bawk.
Messi lim hawnna bilh tel tur a nih bakah ‘GOAT Concert’ leh ‘GOAT Cup’ tihte chu Eden Gardens emaw Salt Lake Stadium lamah emaw thlir zui tur a awm bawk ang.
Inkhelhna hmun tur hi tihfel la ni chiah lo mah se ni 15 velah chuan an confirm theih tawh tur thu Dutta hian a sawi; GOAT Cup-ah hian Messi chu Sourav Ganguly, Leander Paes, John Abraham leh Bhaichung Bhutia tihte nen team khata an awmho tur thu a tarlang tel.
Organiser-te chuan ticket an zawrh chhuah ang angte chu an hralh zawh vek an ring a; an beisei chhin danin ticket man hi Rs. 3,500 atanga intan tur niin, West Bengal Chief Minister Mamata Banerjee pawh Messi chawimawina programme chhim tura beisei leh sawm niin, venhimna lam pawh top priority pek a nih tur thu an sawi.
December ni 13 zanah Messi hian Ahmedabad a pan ang a, tah hian Adani Foundation huaihawt private event chhimin, December ni 14-ah Mumbai leg-in a chhunzawm ang a; he ta meet-and-greet hun hi CCI Brabourne-a nghah tur niin, GOAT Concert leh GOAT Cup chu Wankhede Stadium lamah a ni thung ang.
Mumbai Padel GOAT Cup an belh thar chu CCI, Brabourne-in a thleng thung dawn a ni.
Mumbai-ah hian Shah Rukh Khan leh Leander Paes-te pawh Messi hrula inlan turin an sawiri a, racket lam humin Messi hian minute nga atanga minute 10 vel hun a hman rin a ni.
Maharashtra Cricket Association pawhin ‘GOAT moment’ hun an lo puah ve mek a, tah chuan Messi chu Sachin Tendulkar, Mahendra Sungh Dhoni leh Rohit Sharma-te nen GOAT Captain’s moment-ah an bet ho ang a; Bollywood line-up hra wtak tak Ranveer Singh, Aamir Khan leh Tiger Shroff tihte an inlan bawk ang.
December ni 15 chu Delhi lama hman tur niin, Messi chu PM Modi chenna ina hun hmang tur a ni dawn a, Feroz Shah Kotla lamah GOAT Concert leh GOAT Cup-in a zui ang.