Defence minister-in na zawka Pak khak ve turin SCO member-te ti

Defence minister-in na zawka Pak khak ve turin SCO member-te ti
China-a Shanghai Cooperation Organisation (SCO) Defence Ministers’ Meeting-a tel mek, Indian Defence Minister Rajnath Singh chuan a tel ve ram, Pakistan chu ramri pela firfiaka che nia sawiin a tel ve dang member-te pawh firfiaka chetna thlengah na zawka tawng chhuak turin a ti.
Singh-a hian Jammu & Kashmir-a Pahalgam hmuna mi firfiakte chetna chungchang leh a hnua phuba lak nana Operation Sindoor an kalpui chungchang sawi chhuakin heng hi Pakistan-in a thlawp firfiakna avanga thleng niin a sawi.
May 7-a Operation Sindoor kalpui khan tul tak leh ruahman lawka kalpui a nih thu sawiin, ‘ramri pela firfiakten mi an beihna’ tihtawpna tur leh Pakistan-a ‘ramri peka che thin firfiakte awmna tihchhiatna tur’ a nih thu a sawi.
Pakistan chu na taka sawiselin Singh-a chuan, “Ram thenkhat chuan mi firfiakte tawm himna atan leh an policy tihnghehna atan ramri pela chetna hi an phalsak a ni,” a ti a. Hetiang chi hi khawvelah a awm tur a ni lo va, SCO pawhin hetiang ram hi chu na takin a sawisel tur a nih thu a sawi.
Singh-a hian India chu kawng hrang hrangin ‘firfiaka chetna awm lohna turin a che’ tih a tilang niin a sawi a. “Firfiaka chete awmna hmun hi a awm tawh tur a ni lo tih kan lantir a, bitum chat chat pawh kan hreh lo zel dawn,” a ti.
“Thalaite zingah pawh thil eng emaw lak bika kal sualpui a awm lohna turin kan bei nasa a. SCO hnuaia RATS pawhin hemi kawngah hian hma a la nasa hle a. Council of SCO Heads of State-in ‘Countering Radicalization leading to Terrorism, Separatism & Extremism’ tih chu India-in chairman nihna a chelh laiin a huhovin thuchhuah an lo siam tawh a ni,” a ti.
Singh-a hi Qingdao, China-ah SCO Defence Ministers’ Meeting-ah telin hun a hmang mek a, Zirtawpni thleng hun a hmang dawn a, kum 2020-a Galwan Valley-a China leh India sipai inbeihna nasa tak a thlen hnua Narendra Modi-a sorkara mi pawimawh zin hmasa ber a ni.
Ningania an thutkhawm tan hmain Defence Minister Singh-a hi Chinese Defence Minister Admiral Dong Jun leh member ram dang — Pakistan, Iran, Kazakhstan, Kyrgyzstan, Russia, Tajikistan leh Uzbekistan defence minister-te nen thla an la ho.
SCO meeting bakah hian Singh-a hian Chinese Defence Minister Dong Jun-a pawh a kawm dawn a, China-India military hotline tihnun lehna tur an sawi dun rin a ni.