AAP kaihhruai Delhi sorkar leh Lieutenant Governor VK Saxena te chu thu inhmu lo lehin, tun tum erawh national capital-a mipui 46 lakhs vel kaihhnawih a ni thung a.
Delhi Power Minister Atishi chuan Zirtawpni atangin power subsidy tihtawp a nih tur thu sawiin tihtawp a nihna chhan chu Lieutenant Governor VK Saxena-an file a pawm fel duh loh vang tiin a sawi.
“Zirtawpni atangin subsidy 46 lakh te hnena kan pek chu tihtawp a ngai dawn a. Thawhtanni atang chuan subsidy tawp avangin mipui ten bill sang zawk an chawi a ngai dawn a ni,” tiin Delhi Power Minister Atishi chuan press conference a neihnaah a sawi a, LG chu AAP sorkarin subsidy atana budget dah vek chungin a pawmpui duh loh vang a nih thu a sawi zui a ni.
Minister thusawi hi belhchian dawl lo tia sawiin Saxena office chuan Atishi chu tul lova politics thila kal lo turin a ti a. LG office chuan eng vangin nge subsidy pawhsei thutlukna chu April 4 thlenga engmah sawi lova April 15 dateline nghah kher a nihna chhan leh file chu April 11 ah a hnenah pek a nih chauh thu a sawi bawk.
Atishi thung chuan Saxena chu minute nga chhung lek hmuh a dil thu sawiin power subsidy sawipui a tum thu a sawi a, mahse, darkar 24 hnuah pawh chhanna pek a ni lo a ti thung.
AAP sorkar hian Delhi-a cheng te hnenah thla khatah power 200 unit free-in a pe a, 201 units atanga 400 units hamng chin te hnenah 50 per cent subsidy a la pe tho a ni.
Subsidy dil hi 58 lakh zingah 48 lakh hnenah pek a ni a, he mi atan hian AAP sorkar chuan Rs 3,250 crore chu budget 2023-24 ah a dah hrang a ni.
Delhi AAP sorkar leh Lt. Governor inbakkaih zui zel
