Delhi boruak chhe zel chuan nunphung tibuai chhunzawm zelin, Delhi chief minister Atishi chuan pawl 10 leh 12 zirlaite chu school an chawlh tur thu a puang a, online a class kal turin a hriattir.
He thupek hi Delhi chief minister chuan hman loh theih loh a nih thu a sawi a, an khawpui boruak chu world health organization pawhin a let 60-a a thianghlim tawh loh thu a sawi avangin naupangte chu an school-a zirna kaltir reng chi a ni lo, a ti.
Atishi chuan nimin atang khan pawl 10 leh 12 zirlaite chuan physical class chu titawpin, online in an chhunzawm dawn thu a sawi a, hei hian high school leh higher secondary chin zirna a huam vek dawn tih a sawi bawk.
Delhi boruak hi a ni telin a chhe telh telh nia sawi a ni a, meikhu ang maiin vaivut nawi chu boruakah a zam nasa hle a, hei hian building sang tak takte chu khuh boin, khaw hmuh theih chin a hniam em avang hian thlawhna service ho pawhin an thlawhchhuah theih hun an tikhawtlai nasa hle a ni.
Boruak chhe zel hian eng chen nge a awh dawn a hriat loh a, khawchin enna atang chuan tunkar chho pawh hi a la nasa hle dawn nia sawi a ni bawk.
Delhi-ah pawl 10 leh 12 te school chawlhtir
