Delhi-ah Quad thukhawm
President Donald Trump-a leh Prime Minister Narendra Modi-a inkara neuh neuh a awm hnuin Quad chuan an chakna siam that tumin US, Japan, India leh Australia atanga foreign minister theuhte chu New Delhi-ah an inhmukhawm.
Japanese foreign ministry chuan ram palite hian tuipui lama venhimna, supply chain, technology pawimawh tak tak leh Indo-Pacific-a thawhhona tha a awm theihna tur lam an ngaih pawimawh ber beisei a nih thu a sawi.
Minister-te hian ‘Quad thawhhona tihhmasawn chungchangah ngaihdan an inhrilh tawn dawn,” tiin, Indo-Pacific-a tun hnaia thil thlengte an sawiho dawn tih Indian Ministry of External Affairs chuan Thawhlehnia an thutkhawm hmain a sawi.
Asia-Pacific biala China-in nghawng a neih chhoh zel do letna tura din, Quad hi nikum khan Trump-a’n Russian tuialhthei a lei avanga India hrem nana a bungrua a lak luh atanga chhiah a lak 50%-a a tihsan avangin inmil lohna a chhuak nasa hman hle a, inbiakna neih hnuah tihhniam a ni.
US Secretary of State Marco Rubio-a chuan India hi an inkar tihthat tumin a tlawh mek a. Nikuma India leh Pakistan inkara indona a chhuah khan inkahhai thuthlung siamna tura hma latu niin President Trump-a a inchhal a, hei hi India chuan hnawlin eng ram mah an inkarah an inrawlh lo niin a sawi a. Hemi boruak pawh hian India leh US inkarah inrem chiah lohna a siam hman hle.
Quad hruaitute hi kum 2024 hnuah an inhmuh tawh lo va, hei vang hian a hmaa an inkara thawhhona tha awm thenkhat an hloh tawh nia ngaih a ni a. Tun tum thutkhawm hi kar hmasaa Trump-a leh Chinese President Xi Jinping-a inkara inzawmna nghet zawk siam tura inbiakna neih hnua neih a ni a, Beijing chuan Taiwan chu a nawr chhunzawm zel a, he bial pumpuiah hian ramri a neih thu a sawi chhunzawm zel a ni.
Quad hi Trump-a president hmasak khan a langsar hle a, hei hi China laka US a chet nat vang a ni pakhat a. Tun tum thutkhawm hi US leh Iran-in inkahhai leh Asia ram tam zawk, a bik takin India-a energy lak luhna atana pawimawh, tuipui kawng pawimawh tak, Strait of Hormuz hawn lehna tura inremna siam tum mek laia neih a ni.
India hian tunhma atang tawhin tumah tihbik a nei ngai lo va, khawvel ram chak nih tuma inelnaah lehlam lehlam pawhna insiam thin a ni a. Nikum khan Prime Minister Modi-a’n Trump-a nena an innghirngho deuh hnuah Beijing a tlawh a, Xi-a leh Russian hruaitu, Vladimir Putin-a nen pawh an inkawm.
Foreign Affairs Minister S Jaishankar chuan Indo-Pacific inkungkaihnain pawimawhna a neih belh zel avangin Quad ram palite thawhhona chu a thang zel dawn tih a sawi a. Pathiannia thuthar thehdarhtute a kawmnaah, “Tuipui lama chakna leh mipui rorelna ram chakna kan ni,” a ti.
India tan chuan he inkhawm buatsaih hian Quad hmanga khawthlang ramte nena inzawmna thuk zawka kalpui a tumna a tar lang a, chutih rualin BRICS-a a chanvo chu a vawng reng a, September thlaa New Delhi-in Xi leh Putin-a te telna summit a thleng dawn a ni.
Delhi-ah Quad thukhawm
