Delhi-ah sorkar hnathawkte a zahve pisa kai turin hriattir
Delhi sorkar chuan boruak bawlhhlawh takin khawpui a tuam mek avangin sorkar hnathawkte chu a zahve chauh zel pisaa inkai chhawk turin Nilaini atang khan a ti.
Delhi-NCR huam chhungah hian boruak bawlhhlawh lam chu ‘hlauhawm tak’ huangah awmin Air Quality Index (AQI) pawh hmun eng emaw zatah 450 chung lam a ni a. Hei hi Graded Response Action Plan (GRAP)-a a him lo ber, Stage IV a tling.
‘Boruak bawlhhlawh tihziaawm nan sorkar chuan a hnathawk zahve chauh pisa kai turin a ti a, a zahve dangin in atangin an thawk ang,’ tiin Environment Minister Gopal Rai chuan a sawi. Tun hnaiah sorkar hian Municipal Corporation of Delhi (MCD) nena an pisa kai hun a lo tidanglam tawh bawk.
Delhi-a inziak lut BS-IV leh a aia hlui diesel hmang lirthei lian leh a laihawlte chu ni tin mamawh phur an nih loh chuan tlan a khap a. BS-III petrol lirtheite pawh khap a ni bawk. Pawl 10 leh 12 inkar sikulte pawh zirlaite ngaihtuahna avangin khar lailawk a ni tawh a ni.
Nikum khan Delhi sorkar hian IIT Kanpur nena thawk dunin boruak bawlhhlawh zualpui tihziaawm nan ruah lem an surtir a. Hetiang ti leh tur hian August atang khan hma lak tan a lo ni tawh a; mahse, tun thlengin thutkhawm mumal a la awm lo thung.
Delhi-ah sorkar hnathawkte a zahve pisa kai turin hriattir
