Delhi Chief Minister Arvind Keriwal ED ten man

Delhi Chief Minister Arvind Kejriwal – Enforcement Directorate tena liquor policy scam kaihhnawiha thuzawhfiah atana an kohna tum kua lai a chhan duh loh hnuah March 21 tlai lam khan man a ni a. Kejriwal chuan amah man chunghangah Supreme Court-ah petition a thehluh pawh a hnukkir nghal a.
Kejriwal hian protocol angin trial court-ah petition a thehlut zawk dawn a ni. Chief Minister of Delhi chuan Ningani zan kha Delhi a Abdul Kalam Road a ED office-ah zan a riak a, special court hmaa inlan tur a ni zui a ni.
“Supreme Court a petition kan theh luh chu remand nen a inkalh avangin kan hnukkir a ni. Remand kan argue phawt anga kan lo let leh ang a. Withdrawal chungchangah chuan letter ka pe ang che u” tiin senior advocate Abhishek Manu Singhvi chuan top court a hrilh a ni.
Aam Aadmi Party chief man a nih hma lawk hian he case kaihhnawiha kar kaltaa man Bharat Rashtra Samithi leader K Kavitha chu top court in a petition a hnawlsak a. Kavithaa case ngaihtuahtu bench ngai tho chu Arvind Kejriwal dilna ngaihtuahtu tur a ni bawk.
Kavithaa chu trial court hnenah relief dil tura tih a ni a, a tul chuan bail thleng pawhin an ngen thei tia hrilh a ni. Bench of Justice Sanjiv Khanna, Justice MM Sundresh leh Justice Bela Trivedi te chuan petition chu kalpui zel an duh lo a ni. Court chuan lower court-a kal hmasa phawt lova court sang zawka kal nghal chu a remti lo tiin a sawi a, a chhan pawh mi thiltithei senior political leader emaw Chief Minister emaw nih vang ringawtin court tenau an kalkan tur a ni lo a ti a ni.
Kavithaa petition a court thurem dan enin Kejriwal legal team te chuan chhanna an duh ang hmu dawna an inhriat loh avangin an hnukdawk ta zawk a ni. Kejriwal ber pawh man a ni der tawh a, chutih lai kara ngenna siam chu awmze nei lo a ni dawn an ti a ni.
Hetih lai hian Kejriwal legal team te chuan Lok Sabha inthlan hma lawka mana awm chuan ram pumah thinrimna a siam nasa hle an ti bawk a. Chu mai bakah man a nih avang chuan Delhi Chief Minister ni chhunzawm thei dawn lo va ngaihna awmah thiam loh chang a la ni lo va, puh a la ni chauh a ni.
AAP te chuan Chief Minister tanglai man hmasak ber tawk Kejriwal chu man emaw man lo emaw head of government a la ni reng ang an ti a, Jail chhungah pawh a ni tho ang an ti thung.
Delhi Chief Minister Kejriwal mualpho taka man chu ‘political conspiracy’ tiin Aam Aadmi Party leader Atishi chuan a sawi a.
“Central sorkarin CM tanglai a man hmasak ber a ni. Jharkhand Chief Minister pawh kha man a nih hmain a bang a ni. He ram history-ah Lok Sabha inthlan hun puan hnuah national party convenor chuan a tum khat nan man a tawk a ni. Arvind Kejriwal man hi BJP te political conspiracy a ni” tiin Atishi chuan a sawi.
“Hei hi politics a level-playing field tihchhiatna a nih lohin eng nge a nih ang? Supreme Court hian kan ram demcoracy hi humhim rawh se. BJP tena an duh loh chu Lok Sabha inthlan dawna Arvind Kejriwal campaign a ni” tiin a sawi bawk.
Kejriwal Delhi police tena an man chuan lungawilohna a siam nasa hle a, opposition party tin deuhthaw te chuan Kejriwal an thlawp tlat thu sawiin AAP member nihna INDIA bloc te a party hruaitu lawk te an tawngchhuak hlawm bawk a.
National Conference leader Omar Abdullah chuan Kejriwal man chu remchangah lain ruling BJP te chuan Delhi-ah President’s Rule an puan mai a hlauh thu a sawi a.
Congress MP Shashi Tharoor pawhin Kejriwal man a nihnaah zawhna siamin chumai bakah inthlan dawn ruai tawhah party sum chu hrensaka an awm mek thu sawiin sum nei lovin inthlan an hmachhawn dawna inthlan chu ‘free and fair election’ a ni thei lo a ti.
Arvind Kejriwal chu Ningani tlai lam khan Delhi High Court-in man khapna a pek duh loh hnuah man a ni nghal a. Official 12 velte chuan a chenna in panin zawhna an zawt a, a document leh thil pawimawh dang te lakhawmin zan dar 9 ah an man zui ta a ni.
Kejriwal an man chhan ber hi Delhi liquor policy scam case-ah a ni a, central agency te chuan AAP leader chu ‘phiarrutu ber’ tiin an sawi a. ED te chuan liquor policy hnawl zui tawh khan retailers te tan theih loh tluka ngaih profit margin 185 per cent dawn leh wholeseller te tan 12 per cent dawn a pe niin an ngai a.
Wholesalers te 12 per cent atanga 6 per cent chu AAP te thamna tur niin chu mi tlingkhawm chu Rs 339 crore daih a ni. ED te chuan heta tanga hmun thuma thena hmun khat dawn chu ‘south group’ BRS leader K Kavitha te pawh telna tena an pek a ni tiin an sawi a. Chuta tanga hlawkna an hmuh te chu AAP te chuan election campaign nan an hmang ta thin a ni an ti bawk.
Kejriwal mai bakah hian AAP leader dang – Rajya Sabha MP Sanjay Singh leh Deputy Chief Minister Manish Sisodia te pawh he case kaihhnawihah tho hian manin an awm tawh a. Singh chu October 5 khan man a ni a, Sisodia chu kum khat chuang kalta February 26 khan man a ni tawh thung a. Tun thlengin court atangin relief dawn an la nei lo va, Kejriwal pawh a tâng a nih chuan relief a hmuh hmel chuang lo hle a ni.