Delhi environment minister in boruak bawlhhlawh vei

Delhi environment minister in boruak bawlhhlawh vei
Delhi environment minister Gopal Rai chuan India hmar lama boruak bawlhhlawh zel chuan rampum a nghawng chho thei reng tawh nia sawiin, do a tul tak zet thu a sawi.
Zirtawpni liamtaa central sorkar nen inbiakna an neih zawha an kawmnaah Rai chuan, union minister Shivraj Singh Chauhan leh Bhupender Yadav te bakah, thenawm state a environment minister te pawh an tel thu sawiin, ram lailia boruak tha lo zual zel endik leh hmalak an tum tlan thu a sawi a ni.
Rai chuan kumina central sorkar nen hemi chungchang sawihona an neih chu a tlai mah mah tawh nia sawiin, a lungawi loh thu a sawi a, ‘nikum khan hetiang meeting hi August thlaah kan nei a, hei hian ruahmanna siamna hun tam zawk min pe thei a ni,’ a ti.
‘Kumina sawihona hun hi October thla tawp lamah kan nei chauh a, thla thum kalta kha chuan nei ila, boruak bawlhhlawh avanga buaina hi ngaihtuahna tha zawk hmangin kan hmachhawn thei ang,’ Rai chuan a ti bawk.
Rai chuan ni 15 lo awm tur chhung hi hun pawimawh a nih dawn thu sawiin, ramchhung hmarthlanglam atanga thli tleh chuan Delhi leh a chhehvelah boruak bawlhhlawh a phur lut thei nia sawiin, Diwali hnu lam boruak chu ngaihtuahawm tak a nih thu a sawi.
Heng boruak bawlhhlawh chho hrang hrangte laka inveng tur hian central sorkar chu hma la chak tawk lo leh, ngaihtuahna hmang lovah a puh a, thlasik a lo chhuah hma ngeia boruak bawlhhlawh titlem tura hmalak a nih thu bakah, thenawm state te chu hma la nasa ve turin Rai chuan a sawm bawk.