Delhi school hoin bomb hmanga tihthaihna dawng

Delhi school hoin bomb hmanga tihthaihna dawng
Delhi-a school eng emaw zat chuan Thawhlehni khan bomb hmanga tihthaihna an dawng a. Tun kara a vawi hnihna niin ni kaw chhunga a vawi ngana lai a ni tawh.
Delhi Fire Service (DFS)-a hotu pakhat chuan Delhi hmarthlang lam, Saraswati Vihar-a Crescent Public School-in bomb hmanga vauna an dawng tih an thlen tih a sawi.
Fire department, police, bomb detection team leh ui fingte nen dap nghal a ni a, thil hlauhawm erawh hmuh a ni lo tih a sawi niin news agency PTI chuan a tar lang.
School dangte pawhin hetiang tihthaihna ang hi email atangin an dawng hlawm a, hengte hi endik zui mek a ni tih a sawi.
Hetih lai hian Delhi-NCR-ah hian boruak bawlhhlawh a nasat thar leh avangin Thawhlehni atangin Graded Response Action Plan (GRAP) Stage 4 kalpui niin school tam tak chu kai lovin ral atangin zirtirna pek an ni.
GRAP Stage 4-ah hian Delhi, Gurugram, Faridabad, Ghaziabad leh Gautam Buddh Nagar-a pawl 6-9 leh 11 chinte chu a chhawka school kal leh ral atanga zir tir an ni a. Pawl 10 leh 12 erawh school kal tir an ni thung.
Thawhtanni pawh khan Delhi-a DPS RK Puram-a awm school 20 vel chuan email atangin bomb-a tihthaihna hi an lo dawng tawh a ni. Tun hnai hian India thlawhna ho pawhin tihthaih a tawk nasa hle.