Khawvelah hian ram inrelbawlna sawrkar chi hrang hrang (forms of government) tam tak a awm a, chung zinga lar ber chu ‘democracy’ hi a ni. Eng vanga Democracy chu lar ber nge a nih kan tih chuan, zalen taka mipuiin an aiawha rorel tur an thlan theih vang a ni a. Chu aiawh thlan theihna ‘right to vote’ chu democracy innghahna lungphum pawimawh ber tiin a sawi theih hial awm e.
Mimal emaw lal chhungkaw inthlahchhawng emaw, group thenkhat emaw lalna sawrkar heng—Anarchy, Aristocracy, Authoritarianism, Beaurocracy, Communism, Monarchy etc. ahte hi chuan ram inrelbawlna a fel lo a nih pawhin mipuiin an tuar ngawt ngawt mai a, mipuiin sawrkar an thlak danglam ve mai mai thei lo. Democracy hnuaiah chuan, sawrkar kalphung a that loh chuan mipuiin an ‘vote’ hmangin sawrkar thar an siam thei thin.
Mipuiin mipui tana mipui sawrkar an siamna democracy hi ‘a tha e’ tiin ‘right to vote’ nei ringawt mah ila, sawrkar tha leh tha lo hi aiawh kan thlan duh danah a innghat thui hle a ni. Mahni chhia leh tha hriatna thiang tak hmanga roreltu thlang tur kan nih laia, engemaw therhlo duh vanga kan ‘vote’ kan hralh thin a nih chuan, vote lei duhtuten sawrkar tha an siam lovang tih a hriat nghal a; vote hralh duh kan nih bawk chuan, mahni hlutna leh zahawmna tihbawrhbanna a nih piah lamah, midang sala intukluhna a ni a, ram leh hnam tana mahni mawhphurhna hlen chhuak lo mai ni lovin, mahni leh ram leh hnam phatsanna a ni tel nghal a, ramin a tawrh phah thin bawk. Chuvangin, vote neih ringawt hi a tawk lo va, dik taka vote kan hman hi ram tana mawhphurhna kan hlenchhuahna a ni a, chu chu democracy-in a ken tel tlat a ni.
Kan hma lawkah inthlanpui kan hmachhawn leh mek a ni a, political party hrang hrangin sawrkar siam tumin tan an la mek a, anmahni thuin sawrkar an siam ngawt thei lova, sawrkar siam theitu voter-te thuhneh (convince) tumin tan an la mup mup a ni. Heta tang hian vote hlutzia te, khua leh tui mawhphurhna sanziate pawh a hriat nghal. Democracy innghahna lungphum pawimawh tak voter-te hian kan mawhphurhna kan hriatchian phawt chuan sawrkar tha hi kan siam thin ngei ang.
Hetih rual hian, chhia leh tha hriatna thiang tak hmang lova midang tena an duh duha an chhawr theih tura kan vote hlu tak hi kan hmang a ni emaw, vote kan thlak loh emaw hian, sawrkar tha lo a piang thei tih hriaa rilru fim tak nena vote kan thlak ngei hi keimahni tan bawka tha tur a ni tih i kan hriat thar leh a duhawm hle a ni.
Democracy innghahna chu i vote kha
