Audit report hmanga sawrkar department-ten sum an hman dik tawk leh tawk loh endik thintu Public Accounts Committee chu khauh zawkin a kal dawn tih an chairman, leader of the opposition Lalchhandama Ralte chuan a sawi.
Sawrkar department-ten mipui sum an hman dik tawk lohna chu audit report hmanga hailan a ni fo a. Public Accounts Committee (PAC) pawhin hriatthiamna thui tak a nei thin a. Chu chu remchangah la in sawrkar ban pakhat, legislature zahawmna leh thuneihna chu executive lamin palzam chang a nei ta deuh em, tih ngaihdan a awm a; hemi chungchang hi 9th Mizoram Legislative Assembly-a PAC chuan a ngaihtuah a. Mipui laka a mawhphurhna hlen tur leh sawrkar sum luangral tur hum a tum dawn tih a puanzar chu sawrkar department hrang hrangten insiamthatna hun an neih theih nana hmang turin a chah tih an sawi.
Mipui sum tih chingpen chungchangah PAC chuan dan anga hma lak a hreh dawn loa, a tul anga enquiry chak zawka la in, evidence koh leh case bawhzui kawngah khauh zawka kal a tum a, chumi tur chuan audit report piahlamah compliance report pawh uluk taka zirin, a tul anga ‘spot verification’ nei turin am inpuahchah tih PAC chairman hian a sawi a ni.
Sum hman dan felhlel nia lang chu enliam mai loin, term liamtaa PAC observation neih sate chak takin an bawhzui mek a; audit report-a parawise comment hrang hrang atangin a hmuna tlawh tur engemawzat thlan a ni tawh tih sawiin, “Sawrkar ban pathum zinga legislature hnathawh, session chhung chauh nia ngaihdan awm thin hi Committee chuan thiah a tum a. Mipuiin an chanvo dik tak an chan a, mipui sum hmanna dik taka hman a ni em tih bawhzui kawngah theihtawp chhuah kan tum a ni,” a ti.
PAC-ah hian party hrang hrang awm mah se, House chhung leh pawn lama inbeihna awm thin chu dahtha in, Assembly Committee huangchhungah chuan ram tan chuan inlungrual takin an thawk ho a ni tih pawh lantir an tum tih a sawi bawk.
PAC hmaa ‘evidence call’ neihah hian department aiawhin secretary-te an inlan thin a; remchan lohna tur a neih chuan PAC-ah a dil anga, phalsak a nih chuan a aiah joint/ addl secretary an inlan thin tih Assembly Secretariat hotute chuan an sawi a. Thu zawh an nih hma hian thudik chauh sawi turin ‘thutiam’ an la vek a, PAC hi thudik lo a hrilh tih finfiah leh ni ta se, ‘contempt of court’ tlukpuiin, ‘contempt of Assembly’ anga a chunga action lak theih a ni, tiin zawhna an chhang.
8 Assembly Committee-te hian Assembly aiawhin, Assembly-in a tih tur hrang hrang chanvo leh thiltihtheihna chu, India Danpui Article 208 hnuaia Assembly-in a siam – Rules of Procedure and Conduct of Business hmangin a hlanchhawng a ni.
8 Assembly aiawha Assembly chanvo hrang hrang hlentu an nih angin, session loh laia thukhawm thin ni mah se, ‘Assembly in Session’ anga ngaih a ni. India danpui Article 194 hnuaia neih leh a dang pawh Assembly Committee koh a nih chhung hian a nung reng a; member-te leh Assembly official-te duty hlen tur hi tih buai thiang a ni lo.
8 Assembly-in a aiawha tih tur chanvo a pek dan chu: 249 (1) “Mizoram sawrkar hman atana Assembly-in sum a phalsak hmanral chhinchhiahna, Mizoram sawrkar Annual Financial Statement leh account dang Assembly-a pharhte, Committee-in tul a tih anga lo endik turin Public Accounts Committee hi a awm a ni.
8 Public Accounts Committee hi Mizoram Legislative Assembly-a Committee peng hrang hrang awma a pawimawh ber zing ami a ni a; kalpui thin danah chuan leader of the opposition emaw opposition leader/ deputy leader te chairman-a dah thin niin, Assembly-a Committee 21 awm zingah he Committee-ah chauh hian opposition lam an ‘chair’ thin.
8 Mizoram sawrkar Appropriation Accounts leh chumi chungchanga Comptroller & Auditor General report a endiknaah PAC hian hengte hi zawm a nih leh nih loh a enfiah ang: account-a sum hmanral anga tarlan chu a hmanna tur atana ruahman ang thlapa hman a ni em, tih leh a hmanna nen a inmil em, tih. Sum hmanral chu a phuartu (authority) duh dan nen a inmil thlap em; thuneituten chutiang tura dan an siam angin re-appropriation tih a ni em, tih.
8 Tun tuma PAC member-te hi kumin April-a ruat an ni a; chairman-ah Lalchhandama Ralte (MNF) niin, member dang chu – C Ngunlianchunga (INC), Dr K Beichhua (BJP) leh ZPM MLA pali – VL Zaithanzama, W Chhuanawma, LtCol. Clement Lalhmingthanga leh TBC Lalvenchhunga te an ni. Kum 2 leh a chanve hnu ah member hi thlak thin an ni a; thlak loha tel tlang an awm thei tho.