Department pahnih hmalakna sawi
Independence Day hmanga Serchhip-a kal Supply leh Revenue minister B Lalchhanzova leh amah tawiawmtu Revenue secretary Vanlalmawia leh Supply secretary Teresy Vanlalhruaii te chuan Zirtawpni khan Serchhip-ah thuthar thehdarhtute an kawm.
Minister chuan Serchhip district hmasawnna ngaihtuah a, thil tangkai tih theih beseiin Revenue leh Supply hotulute nen an rawn kal tih sawiin, Land Revenue & Settlement leh Food Civil Supply & Consumer Affairs department in Serchhip district leh Mizoram pum tana an hmachhawp puanzar leh inrawnkhawmna hun atan an hmang tih a sawi.
LR&S secretary chuan an department inrelbawl dan a bul thum atanga a fel loh avangin, hma sawn zel turin insiamrem leh tihdanglam tur a tam tih a sawi a. Hmalam pan turin a bulah an let a ngai ta zawk tih a sawi. Mipui hnaiha LR&S hotute an awm theihnan thingtlang khaw lian deuhah ‘village revenue official’ dah an tum a, sub division-ah assistant commissioner ruat an tum a, a bul tanna atan Thenzawl leh Vairengte-a dah phawt an tum tih a sawi.
DC-te chu revenue thuneitu sang an nih avangin an thuneihna tihpun an tum a. State Assembly-a Mizoram Revenue Amendment Act pass tura thehluh a ni tih a sawi. Technology hman tangkai an tum dan leh hma an lak mek dan, chhiah pawh e-ram hmanga online-a pek theih a nih thu, digital land record an kalpui mekah GIS mapping tih niin online in mahni ram chin chiang taka en theih a nih thuai tur thu a sawi. Revenue Court Manual siam mek niin, ram buai chungchangah DC leh ADC-te chu first appellate atan ruat an tum tih a sawi bawk.
FCS&CA secretary pawhin retailer-te hnenah buk dik taka buhfai leh a dangte an pe chhuak ngei tih hriatna atan Supply kudam tinah digital weighing scale dah a ni dawn a, August thla chhung hian khawl a lo thlen kim beisei a ni tih a sawi a. Sawrkar laipui duh dan angin beneficiary zawng zawng e-KYC ti fel vek turin khaw tina VC-te tanpui turin a sawm tih sawiin, September 30 thleng hun an neih avang leh e-KYC tifel loten ration an dawn theih dawn loh avangin tan la turin a ngen tih a sawi.
Online-a ration card dilna siam an tum thu, mipuiin thla tira ration an dawn theihna tura tan an lak dan bakah ration chungchang a ni emaw an department kaihhnawih engpawh harsatna emaw zawh duh emaw mipuiin an nei a nih chuan toll free no. 1976 ah englai pawha biakpawh theih an ni tih a sawi a ni.
Department pahnih hmalakna sawi
