- B Lalchhanzova
Department thawhho uar kan tum
- B Lalchhanzova
Sawrkar department zingah an thawh dun theihna kawngah thawh dunna siam zel an tum dawn tih minister B Lalchhanzova chuan a sawi.
Labour, Employment, Skill Development & Entrepreneurship department leh Land Revenue & Settlement department-in ITI Aizawl-a surveyor training course tih changtlunna kawnga thawh dunna tur convergence framework an siam chu Zirtawpni khan an ziahhnan.
LR&S minister B Lalchhanzova chuan ZPM sawrkarah department thawhho uar zel an tum tih sawiin, welfare institutions leh home tan awlsam zawka buhfai pek a nih theihnan Supply leh Social Welfare department-in thawh dunna thuthlung an siam tawh a. LESDE nen survey training course tih changtlun a ni tur pawh lawmawm a tih thu a sawi.
Mizoramah la survey loh ram a tam em avang leh mipui leh pawl bakah sawrkar ang pawhin ram teh hi demand a san em avangin empanelled firms bakah licensed surveyor neih dan an dap a. Sawrkar bakah private-a chhawr theih leh chhawr tlak ni turin ITI Aizawl atanga zir chhuakten thiamna an neih theihnan department pahnihin intichak tawn tura an thawk dun thei chu Mizoram tan bung thar a ni tih a sawi a ni.
LESDE minister Lalnghinglova Hmar pawhin surveyor tha mamawhna a sang a, ITI Aizawl-ah survey zirna tha lehzuala kalpui an duhna LR&S minister nen an sawidunna a tak a chang ta chu lawmawm a tih thu a sawi a. ITI chu India ram pumah tuaithar turm a ni a, chumi tihhlawhtlinna atan LR&S department a inhawng chu lawawm a tih thu a sawi.
LR&S department nena thawh dunna chuan LESDE department nihna a khawih kim vek, tiin, ITI atanga surveyor training-ten eizawnna leh entrepreneurship lamah inrintawkna nen ke an pe thei dawn tih a sawi a ni.
Thawh dunnaah hian ITI Aizawl tih chakna atan LR&S Surveyor Recruitment Rules leh ITI training course inhnek rem tir, Revenue department-a mithiamten ITI Aizawl-a zirlaite zirtirna pek, ITI zirlaiten apprenticeship leh on the job training an neih theihna a tel. ITI Aizawlah Revenue department promotion training, refresher course bakah MCS officer tharte tan basic of survey training kalpui a tel a. Survey khawl leh software lei leh hmana thawhdun a huam bawk.