Ruata Sailo
Construction Work hnà thawh tur, restricted tender, without call of tender, rate fix sâa inpek, through Departmental work tihte hi mimal/páwl hnêna pêk chungcháng thû chanchin bû leh social media-ahte tunlai hian kan hmu thìn a. Tin, Departmental Work-a GST chhiah lâk thlengin sawi rîk a awm ta bawk a, chuvàngin Departmental work kan tih fo hi han sawifiah thain ka hria a ni.
Departmental work chu Department-in Contractor emaw ruai lo va anmahniin an thawh hi a ni tih kan hre theuh ang a. A thawh dàn leh engte ngê tih ngai tih hi sawifiah ngai lai chu a ni.
PWD-ah chuan Departmental work-a hnà an thawh chuan JE/SA-te’n labour an ruai a, zíngah muster roll hming lamin ni tin attendance an chhinchhiah a, thla tàwpah labour-ho hlawh an sem thin.
PWD-in labour an rawihna rate hi sorkár-in minimum wage rate-a fix a ni a, vantlàngin hlawhfâ kan rawihna rate aiin a tlém daih thin a ni. Tun lai hian vantláng hlawhfa rate hi Rs. 600/- leh PWD labour unskilled rate hi Rs. 420/- a ni awm e. A inthlauhna hi skilled/mistiri-ah chuan a tam leh zual mai thei.
Hetih avàng hian miin local hlawhfà hlawh pe tur chuan PWD labour pakhat leh a chanve dáwn lai hlawh ang a pêk a ngai a ni. Miin local hlawhfà ruaia hnathawktûte hlawh a pêk zât tur muster roll labour rate-a chhut chhuak tur chuan a hlawhfa rawih aia tam daih thawk anga ziaka, hming lem a phuahchawp a ngai. A nih loh pawhin hlawhfà te’n an thawh tak tak aia ni tam tak thawk anga ziak a ngai ang.
Ni tin hnathawkte hming lamtu JE/SA khân thawk ve lo hming lemte kha hming lamna-a awm anga chhinchhiahin ni tin hming lamtû signature a pêk a ngai ang. Tin, a hna neitu (Contractor?) khan, hna lian, rei tak thawh ngaiahte chuan an hnathawkte kha ni tin an lo chhinchhiah thlap thlap lem lo va. Thla tawpah JE/SA-te’n muster roll an close-in hming phuahchawp teuh a ngai ang. Hna lian deuhah chuan cheng nuai tel fé muster roll labour hlawh anga chhut chhuak tur chuan hming tam fe phuahchawp a ngai ang.
Muster roll chu thla tàwpah JE in a close a, SDO hnênah submit-in SDO-in EE hnênah a submit leh a. Tichuan EE-in pawisa draw-in SDO hnenah a pe a, SDO in JE hnênah a pe leh ang. SDO hian muster roll-ah khan labour-te hlawh hi labour hnênah ‘keimà’n ka sem a ni’ (paid by me) tiin certificate ziakin a signature a pe thìn a ni. JE-in labour-te hi keimà’n ka identify a ni tih leh sunday benefit a la thei tiin certificate a pe bawk thìn a ni. Labour-te khan an hlawh an dawng ngei tih chhinchhiah nan an hming zàwnah sign-tír emaw, kutzungpui nemtír emaw an ni thìn. Hei hi labour hlawh chungchang a ni.
Tin, Departmental work-a hman tur materials, lung, rora, balu, cement, thingzai, etc te hi Department approved rate in approved firm atanga lei a ngai. Heng lei zawng zawng leh leinate hi a hnà neitu (contractor?) te’n an lo chhinchhiah thlip thlep lo fo mai. Chuvàngin phuahchawp bawka material supply bill siam a ngai thìn. Tin, a supply-tûte pawh hi supplier hran hran an nih khán a hna neitu (contractor?) tán bill lak a buai thlak avangin phuahchawp bawk a ngai thìn.
Tichuan, Departmental work tì-a, tûte emaw construction hna thawhtír an nih chuan labour tam takte’n an ni tin hlawh muster roll-a chhinchhiah a nih anga an hnena sem thìn ang kha a hna neitû khan a dawng ta vek a. Material supply bill pawh mi hran hran supply anga hming hrang hrangte bill kha a la ta vek thìn a ni. Chutiang tur chuan labour tinte hming zàwnah labour hlawh la angin hming sign lem emaw, kutzungpui nemsak emaw leh supply bill latûte signature kha a lema phuahchhawp teuh a ngai bawk ang. A hnà neitû kha labour zínga pakhat anga a hming ziak tel a nih loh phei chuan a hming a lang ve miah lo a ni.
A hna neitu (contractor?) kha eng zât rate-a thawk nge, eng zât nge bill-sak tùr ni tâ ang le? Contract hna pangngaiah chuan contractor-in a thawh ngamna rate-in a chháng a, chu chu approved a ni a. Contract rate a awm a, a hna thawh kha measurement là-in tehsak vek a, contract rate anga bill pêk mai tur a ni. A thawh tam leh bill a la tam a, a thawh tlèm leh bill a la tlém a, a thawh phú tâwk angin bill siamsak thin a ni. Departmental work anga mimal thawhtír a nih erawh chuan a thawh anga bill pêk turin tehsak a ni lo va, hnathawhna rate a awm lo bawk a ni. Chuti si engzât ngê an pêk tâk ang? Hnathawhna tùr atána Department-in estimate an siam ang ang kha pêk an ni mai dáwn a ni. Chumi zât pe thei tur chuan muster roll lem, chumi zât hlawh chhuak thei tùr, hlawhfa zât phuahchawp a ngai ang. Chumi zât lâk theihna tur supply bill-te phuahchawp a ngai bawk dáwn a ni.
Department thenkhatte phei chuan work manager tih emaw, supervisor tih ang tein an hnà thawhtír kha an phuahchawp a ni àwm e. Departmental work-ah hetiang ang post hi a awm àwm lo mang e. Appointment order-te issue-in an appoint em ni le! Engtin ngê an hlawh pawh an bithliah áw! PWD-ah chuan Departmental work chu JE te leh SA te’n an enkawl thìn a ni.
Hetiang a nih avàng hian Departmental work tì-a mimal thawh tùra hna inpêk hi a him lo vin, a fel lo hle a ni. Departmental work anga mimal hna an thawhtír chuan SDO te, JE te, SA-te hi an duh reng vang ni lo vin thil him lo tak tihtír an ngai thìn a ni. Hlawhfà rawih si loh hming lem, supply petû ni si lo hming lem leh labour awm tak tak lo signature lemte siam a ngai thìn.
Tin, Departmental work atanga GST lâk tum thû pawh kan ngaithlà a. Tû khân nge GST pe ang le? Department khân pe dáwn ta se Department kutah hnathawhna sum a lût miah bawk si lo va. An hna thawhtír (Contractor?) kha han thíng dáwn sé GST lâkna tùrin a hming lanna a awm dáwn bawk si lo a ni.
Departmental work kan tih hi kan chiang chiah êm áw?