Diakkawn-in NH kawngpui phiatfai
Kolasib Diakkawn chuan Thawhtanni khan an venga national highway kawngpui an phiatfai a. Phiah fai chhan hrang hrang an nei a, politics zawnga inbeihna leh midang tihmualpho tumna a ni lo tih an sawi. Diakkawn veng thenawm New Diakkawn khawtlang pawhin VC ruahmanin an vengchhung kawngpui dung an phiatfai ve bawk.
Kolasib Diakkawn Village Council leh All NGO chuan kawngpui an phiahfai chungchangah thuchhuah an siam a. Mizoram khawpui fai inelna awm tur inbuatsaihna atan UD&PA department Kolasib chuan khawpui fai an nih theihnan khawchhung VC tin tan veng fai inelna a kalpui mek a. Diakkawn khawtlang pawhin an fai zual theihnan kawng hrang hranga hma a la a; chutihlaiin an veng paltlang national highway a chhia in vaivut a tam em em a, faina lama hma an lak meknaah heng vaivut then hi tulin an hria tih an sawi.
Vaivut khu hian hriselna a tihchhiat theih avangin, thla kalta lamah pawh VC ruahmanin hnatlangpuiin khawlai khu leh bawlhhlawh an lo phiatfai tawh tih an sawi bawk.
NHIDCL-in national highway kawngpui siamtu atan Jandu Construction Company a ruai a, working season a nih veleh kawngpuiah bitumen phah an tum thu leh kumthar March-a an hnathawh tur chin zawhfel vek an tum thu sawiin, ‘Kumin bikah Mizoram district zingah Kolasib district hi ruahtui dawng tam ber a ni a, contractor-in thla thar atanga kawng chhiat phah hna thawh a tum thu a sawi pawh dawhthei takin kan nghak hram hram a ni. Kan thahnemngaih luatah kawng siam tur contractor-te ti thlabar zawng leh awm tinuam lo ang chi phei chuan khawtlang mipui chet thawh lo turin kan inngen tawh a ni,’ a ti.
Diakkawn VC president Pu Lalhmachhuana chuan national highway kawngpui dung phiahfai chu kawngpui siamtha tura mawhphurtute nawrna pakhat a ni tih a sawi a. “Tunah hian NHIDCL hnuaia contractor Jandu Construction Company chuan thla thar lawk atanga siam tan an tum thu an sawi a, keini chuan midang rikrap zawng leh Mizoram hmundanga mipui nunphung tibuai zawnga hma lak hi a tul loin kan hria a, chutiang hmalakna a awm a nih pawhin kan vengchhung mite chu tel ve lo tur pawhin kan inngen a ni. A tul leh pawimawh chu VC-in theihtawp chhuahin kan nawr reng a. Hetih rual hian kawngpui dung phiahfai a ni hian sawrkar leh thuneitute beng a thleng a, contractor-in kawngpui siam tura chak zawka hma an lak theih phah phei chuan chu chu kan duhthusam ber pawh a ni,” a ti.
Hnatlangah hian Diakkawn khawtlang mi 800 vel an thawkchhuak tih thu dawn a ni.
Mizoram PWD hnuaia contractor Sadguru-in hun rei tak Kolasib leh Bilkhawthlir inkar NH kawngpui siam leh enkawl hna hi a thawk a, 2024 October-a defect liability period a zawh thleng khan kawng chhia thawmthat pawh an thawk tha tawk lo hle tih sawi a ni. Mizoram sawrkarin kumin July 7 khan NHIDCL kutah helai kawng hi a hlan fel a, NHIDCL hian contractor Jandu Construction ruaiin tunah hian black topping tura hmalak mek a ni a,working season – November 2025-ah alkatra luan hna an tan dawn tih an lo sawi tawh a ni.
Diakkawn-in NH kawngpui phiatfai
