Dr. Krista Roluahpuia
IIT Gandhinagar
Thu hma
Mizote football league ngaih hlut em em, English Premiere League (EPL) lamah ropui takin Arsenal an champion hnuah, World Cup Football thliin min han nuai tha veleh a. Infiamna zawng zawngah Football hi a hnam angin kan ngaihsan bik avangin World Cup pawh kan ti mai mai lo hle! Mizoram sorkar pawhin final tuk kha chu ram pum chhuti a ni tiin chawlh a puang hmiah mai a nih kha.
Mahse, heng zawng zawng aia Mizoram Football titi luah bertu erawh ‘Ronaldo nge Messi?’ tih hi a niin a lang. Football inkhel thiam lem lo, football la thu tak em em lo pawhin Messi emaw Ronaldo emaw tu emaw zawk zawk hi an lo tan viau zel mai a. Football aiin anmahni pahnih hian titi an ti tam zawk hial mai awm e. Mizorama lo haw changte hian zirlai zingah thu ka sawi thin a. Naupangho tan zawhna hun kan hawn hian a tawp lamah, ‘Messi nge Ronaldo?’ tih hi fiamthu ti tak deuh siin min zawh an ching thin. An pahnih hian thiam viau mah se hetiang ang zawnga ngaihtuahna sen nasat lutuk hi a hrisel lo ve thei viau a. Tun tum chu hetiang lam hawi hi rawn ziah ka tum dawn a ni.
A kaikuang – Aristotle
A hmasain dichotomy awmzia sawifiah hmasa dawn ila. Dichotomy chu thil nihna leh nih phung (category) inang lo sawina a ni a. Entirnan: thil lan dan (colour) sawi dawn ta ila ‘a dum emaw a var emaw a ni’ han ti ta ila hei hi ‘a dum a var dichotomy’ chu a ni tihna a ni. Entirna pek tur a tam mai – dik leh dik lo, fel leh fello, lei leh van, on leh off, leh a dang tam tak. Heta thil nih phung leh nihna (category) hi Aristotle khan a ngaipawimawh hle a, thil sawifiah nan a hmuchhuak a ni ber mai.
He category atang hian law of non-contradiction leh law of excluded middle, philosophy leh science zirna inghahna pawimawh tak a hmuchhuak ta a. A tawi zawngin, chu chu dichotomy lo chhuahna pawh a ni ta chiah a ni. Hemi law pahnih hmang hian thil ni kawp thei ngai lo tur, thil hrang hlak – rinchhinna (proposition) kan pek pawha a dikna lo chhuak inang thei miah lo ang chi kha kan nei ta a ni. Entirnan: room chhungah bulb pakhat kan chhi a, room chu a en loh chuan kan ‘off’ tihna a ni a, a en erawh chuan kan ‘on’ tihna a ni thung. Thil ni thei pahnih chauh, tin inang miah lo a awm a, hei hi dichotomy kan tih chu a ni mai.
False dilemma
Dichotomy hian harsatna lianpui a nei a. Chu harsatna chu he false dilemma hian a rawn hrilhfiah ta a ni. Entirnan: Kan va bazar a, in lamah kan let ta a. In kan thlen hma chuan kan in kawngkapui chu ‘a inhawn loh pawn a inkhar ang’ tiin kan ring lawk thei. Chumi awmzia chu kan va en hunah kawngkapui chu a inkhar lo a nih chuan a inhawng dawn tihna a nih chu. Mahse, kan va en chian chuan kawngkapui chu degree 10 chauhin emaw degree 5 chauhin emaw a lo inkau thei tlat. Chumi awmzia chu a inkhar chiah lova, a inhawng chiah bawk lo tihna a nih chu. Helaia ‘inhawng’ leh ‘inkhar’ chauh awm thei emaw kan tih lai hian a inkarah thil ni thei tam tak a lo awm reng a – hei hi false dilemma (emaw false dichotomy) kan tih chu a ni ta a ni.
Hei hi kan hrethiam em aw? Tui hi chawhtawlhah han dah la. I thianpa chu a vawt nge a sa tiin a rin tir chhin teh. I thianpa khan duh thlan tur pahnih chauh a nei emaw kan tih lai khan – a inkarah duh thlan tur tam tak a nei thei teuh a ni. A vawt loa, a sa lo, a lum pep pep tih chauh pawhin a chhang thei che. Tui kha, a vawt emaw a sa emaw chuah ni thei anga va ngaihna kha false dichotomy chu a ni ta a ni.
Messi nge Ronaldo?
Aristotle-a law leh false dichotomy ka ziah atang hian ka sawi tum i tinzawn thiam em? Ngun taka i chhiar chuan, Ronaldo nge ropui zawk Messi tih te, Messi nge thiam zawk Ronaldo tih te, leh Ronaldo nge hlawhtling zawk Messi tih te hmanga rinchhinna kan siam zawng zawng hi a chunga kan sawi false dichotomy kan tih ang khi a ni ta vek tihna a nih chu. Chumi awmzia chu, dichotomy-in buaina (problems) leh thatlohna (limitation) a neih zawng zawng a khar chhawng ve vek tihna a nih ber mai. Hetiang chauha thil ngaihtuah hi a hrisel loh em em chhan pakhat chu – zau tak leh chik takin thil ngaihtuah a tiharsa thin a ni.
Entirnan: Messi nge ropui zawk Ronaldo han tih hian tu zawng nge ropui tihah chauh khan kan rilru kan pe thin a, a inkarah leh a behbawmah thil tam tak a awm thei tih kan hmufiah thei thin lo. Ropui chu eng tia teh tur nge tih te, footballer ropui nih theihna enge ni tih te, leh a dang tam tak kan zu chik tawh lo thin a. Tu nge thiam zawk tih zawhna pawh hi a ni tho. Thiam tehna eng nge? Thiam ber nih theihna tehkhawngah eng nge hman tur? Zawhna tam tak a rawn lang zung zung a ni. Kan thil thlir dan, pawm dan leh hmuh thiam dan a rawn hruai kawi nasa hle tih pawh kan hrethiam thei ang. Heta tanga chiang em em mai chu – dichotomy hmang chauha thil kan thlir chuan kan thil hriatthiam dan kha a rawn sawr zim nasa ta em em a ni. Sawi dan dangin sawi ta ila – kan thil hriat a tihtawi phah pawh kan ti thei ang chu.
Dichotomy taka ngaih tuah lovin awmze nei zawka thlir dan tur tha pakhat chu – an football zinkawng va zirchian a, va hriatthiam pui hi a ni thei ang. Ronaldo chu taima, tumruh, fuat ngah, training nasa, practice reng peih, insumthei, in-discipline em em angin kan hmuthiam thei anga. Chungte chuan football khawvelah ropui takin a rawn vawrh chhuak a ni. Messi ve thung chu talent nei tha, pian ken thiamna nei, che rang, creative, ball thiam, thil man chak em em angin kan va hrethiam ve thei thung ang. Ronaldo ang thoin ani pawh heng avang hian football khawvela hlawhtling berte zingah kan chhiar ve theih phah a ni.
Mahse, hetah pawh hian ‘taima’ leh ‘talent nei’ ang chauhin kan la thlur bing leh thei. Hei pawh hi false dichotomy chi khat a la ni tho. Chuvangin talent leh taimakna chuan an chenna environment chhungah, an club football ecosystem chhungah eng tiangin nge nghawng a neih tih kan zu zawh tel a pawimawh dawn tihna a nih chu. An mihirng mihrinna (personality) te, an chhungkaw background te, an pianna khua leh ram thlengin, chu taimakna leh talent chuan eng tin nge hetiang ni thei turin a puih tih kan inzawh a tul dawn a ni. A tawi zawngin, heng zawng zawng kan inzawh a, chik takin thil ni thei zawng zawng (nuance)-te kan khawrh chhuah vek hnuah chuan, Messi pawh a lo taima tho a, Ronaldo pawhin talent a nei tha em em tho a ni tih kan hmu thiam thei ang. Lei leh Van false dichotomy pawh hi
Lei leh Van false dichotomy hi Mizo Kristiante chauh ni lo hnamdang pawhin an buaipui viau a. Mahse, Mizote hi a buaipui nasa pawl leh a nghawng nasat ber kan ni hial awm e! A tawi zawngin – kan Zosap missionary lo kalte kha theologian an ni vek lo a, a then chu zirtirtu te, a then chu damdawi lam thiamte an ni ve nawk a. Pathian thu (theology) kha a chin chhuahin min hrilh thuk bik lem lo. Chuvangin theology kan hriatthiam dan tlanglawn tak pakhat pawh – Lei lam thil leh Van lam thil then hran phawkna hi a ni.
Lei lam thil chu chhe thei, tlo lo, belh tlak loh – sual leh ramhuai thil angin kan ngai a. Van lam erawh chhe thei lo – Pathian nena kan inzawmna, hlim tawp hlau lova kan chenna tur angin kan hrethiam daih thung. Hemi avang hian lei lam thil angah kan nem kai tawh hi chu kan ngaipawimawh thei lo. Entirnan: Kohhran treasurer chuan Kohhran sum chu rinawm takin a vawng a, mahse office lama a sum vawn chungchangah erawh a rinawm lo viau thei. Biak In chhung thil chu vanram nena inzawm anga kan ngaih avangin kan ngaipawimawh a, mahse a compound pawna thil awmte erawh enga tan mah kan ti lem lo a ni. A chhan ber chu Lei leh Van dichotomy hian kan thil hriatthiam dan a rawn hruai kawi nasa lutuk a ni.
Ringtu tha tak ni turin kan hnaah rinawm a ngai tel tih te kan hmu thiam lova. Tin, kan nitin nun leh vanram nun a inzawm a ni tih pawh kan pawm thiam lo tihna a ni ber mai. Vanram leh Lei inkarah hian Kristian nun pawimawh tam tak a awm a ni tih pawh kan hre lo tihna a nih chu. Chuvangin, sorkar leh kohhran tarmit atang chuah thil hmuhfiah tum te, rau leh khawvel (rau lo) thlirna tlang pahnih atang chuaha hriatthiam tum te hi a fuh lo thei viau a ni.
Tlipna
Ziah tel tur a la tam khawp mai! Fel leh fello (sual) chauha mi va hmuh tum tlatnate pawh hi thil tangkai tak a ni ber lo khawp mai. Hemi avang hian kan dan siamtute pawh, dam lo kan taima, mitthi ral taima an nih chuan MLA tha angin kan chhuah leh mai zel thin a. Ram tan hna an thawk tak tak em tih lam kan ngaihtuah thleng pha tawh lo thin! Hengte hi thil pawi tak a ni. Mahse, kan sawi vek seng loang. He article kaltlanga ka lo sawi tum ber chu – thil nihna leh kalphung hi thil ni thei pahnih hmang chauhin thlir tam lovang u tih hi a ni. ‘Ronaldo nge Messi?’ tih pawh hian Mizote zingah thil pahnih ni thei hmang chauha thil thlir a tihluar niin a lang a. Kan fimkhur a pawimawh awm e.