Dinthar atanga Tuikuak lui zawh tur Aizawl West Outlet Project tan dawn
Aizawl West Outlet Project hnathawh tan tur chu Nilaini khan UD&PA minister K Sapdanga’n a khuh hawng. He project hi Dinthar atanga Tuikual South inkara Tuikual lui leh a hrula kawr siam leh a chunga lirthei tlan theihna siamna tur a ni.
Khawtlang thawhhona tha tak avang leh mimal thenkhat, an chenna in thiah then ngai hial bakah ram pek ngaiten phal taka an pek avanga he hna hi tan theiha peih a ni ta chu lawmawm takzet tih UD&PA minister hian a sawi a. Tunhnaiah UD&PA-in hmalakna an ngah a, heng hna hlawhtlinna atan hian sawrkai lai bakah hun hmasa lam hruaituten hmathlir an lo neih that zar an zo tih a sawi.
Aizawl West-II bialtu MLA, minister Lalnghinglova Hmar chuan, Aizawl West Outlet Project atana sum an neihin helai hna pum hi a daih dawn loh avangin, kawng hi laklawh deuhin a tawp dawn a, chumi chhunzawmna atan chuan UD&PA-in Storm Drain Project an neih nen tangkawpin, Dinthar atanga Tuikual ‘A’ mual thleng tuiluankawr siamin, a chungah lirthei tlan theihna tur siam a ni dawn tih a sawi a. A ram phal taka petu Pu Sangthanga, Tuikual South, ground survey neih ni taka chesuala nunna a chan chu pawi a tih thu leh a tawrhpui thu a sawi bawk.
He hna hi SASCI atanga thawh tur a ni a. Project pahnih kaihkawp niin, sum sen tur hi cheng vaibelchhe 30.96 a ni. He hna atana project management consultant chu ARDECO Design Build niin, contractor pahnih – Zothan Consultancy Services leh Studio Hamlet-in an thawk dawn a ni.
RCC hmangin drain tha tak siam tur niin, chumi chungah chuan metre 4-a zau lirthei tlanna tur leh metre 1.5 a zau footpath siam tur a ni a, a vaiin km. 1.68 a thui a ni dawn a. He kawng hi Dinthar YMA ram hrula intanin Tuikual lui a zawh chho anga, Tuikual ‘A’ muala CT Turning point-ah a chhuak dawn a ni.
Dinthar atanga Tuikuak lui zawh tur Aizawl West Outlet Project tan dawn
