District Hospital-ah IPHS norms
hmang turin CESJ-in sorkar phut
Damdawi ina doctor leh nurse indaih lo lutuk leh he indaihlohna chhuanlama hman a nih fo lohna atan sawrkar laipuia Ministry of Health & Family Welfare-in Indian Public Health Standards (IPHS) a siam chu zawma kalpui turin Mizoram sawrkar an phut tih Centre for Environment & Social Justice chuan an sawi a. Zawm tumna a awm lo emaw ngaihpawimawh emaw a nih loh chuan ministry lamah hian thlen zel an tum tih an sawi.
Centre for Environment & Social Justice (CESJ) thuchhuak chuan, 2025 January 10-a District Hospital Siaha-a damdawi thiam inthlahdahna (medical negligence) nia ngaih theiha Daniel Lalruatfela (24) thihna chu pawi a ti takzet a. Ngun taka thil thlen dan an thlithlai mek laiin Health & Family Welfare principal director-in he thil chhuichiang tura order a chhuah chu lawmawm a ti a. Chutihrualin mipui ngaihdana damdawi thiamte inthlahdah vanga thihna hial a thlen pawha intan thinna awm chu a tawp theihnan he thil chhui tura ruat ten uluk taka hlen turin an ngen tih a sawi.
‘Mizoram mipui rethei tak tak, natna khirhkhan kan tawh pawha private hospital tha leh changtlung zawk emaw phai lam damdawi in tha emaw pan ve thei loten kan chenna atanga hnai bera damdawi thiamte hi kan beiseina an ni a, an tawngkam ringawt pawh min thlamuantu leh damna min petu a nih lai a, hetiang thil a thleng leh thin hi a pawi kan ti. Hetiang hi Mizoramah vawi tam a thleng tawh a, Siaha thil thleng kha doctor on-call duty kha awm se chuan Danial Lalruatfela nunna chhan thei lo mah se, a chhungte leh mipui kan lungdam ang,’ a ti.
Kum 38 state kan nih hnuah kan health system a la chhe leh healthcare inziahluhna lah a to em em chu mirethei tan damdawia inenkawl kawngah dam khawchhuahna a chaurau hle tih sawiin, mipuiin sawrkarah chhiah tam tak kan chhunkhawm laiin, damdawia enkawlna kan dawn let erawh a beitham hle tih CESJ hian a sawi
District Hospital Siaha-ah hian IPHS norms angin medical officer 32 an awm tur an nih laiin, 10 chauh an awm a, nurse 52 awm turah 28 an awm a, khum 114 awmah function lo tam tak a awm bawk tih CESJ hian sawiin, ‘Hetiang hi District Hospital dangah pawh an dinhmun a ni tlangpui a. IPHS chuan district hospital tinah Casualty/ Emergency department medical officer awm tur an nih laiin, Mizorama District Hospital tinah an awm lo vek a. Ministry of H&FW-in IPHS a duan ang hi Sub-District Hospital & District Hospital tinah kalpui turin Mizoram sawrkar kan phut a ni,’ a ti.
IPHS norms kalpui a nih loh vang hian damdawi thiam inthlahdahten chhuanlamah an hmang bawk thin, tiin, Mizoram sawrkarin a hun hmaa thihna leh a hnam pum anga hrisel lohna hrang hrang a ziaawm theihnan damdawi thiam post create chu ngaipawimawh berah nei turin a duh tih a sawi. Heng tarlan hrang hrang leh sawrkar hmalakna tur hi ngaihpawimawh a nih loh chuan ministry-ah Mizoram department data report thehluh dan leh a taka zirchianna nen an thlen zel dawn tih a sawi bawk.
District Hospital-ah IPHS norms hmang turin CESJ-in sorkar phut
