District tinah Old Age Home
Social Welfare minister Lalrinpuii chuan Mizoram district tinah kum upate awmna leh enkawlna – Old Age Home siam thuai tum a ni tih a sawi.
Regional Resource Training Centre (RRTC) for Senior Citizens chuan Ningani khan kum upate tan hriat tur tul inhrilhin inkhawm a buaitsaih a. Aizawl veng hrang hrang atangin MUP member 650-in an chhim.
Hmanpuitu Social Welfare minister chuan kum upate thiamna leh an tawnhriat hlu tak tak chu thangtharten ngaihhlut nachang kan hre tan tawh viau a, kan la hriat belh telh telh dawn tih a sawi. Mizoram sawrkarin kum upa zawkte a theih chinah a ngaihsak a, pension pawh an tipung a. An tana tih theih chinah chuan puih zel an inhuam tih a sawi a ni.
Kumin April 8-a Dehradun-a Ministry of Social Justice & Empowerment buatsaiha Union minister Dr Virendra Kumar hoa Social Welfare minister ho intawhkhawmah rualbanlote tan bik school mamawh thu, kum upate tana day care cum recreation centre mamawh thu, district tina integrated rehabilitation centre for addicts (IRCA) neih theih an duh thu a thlen Lalrinpuii hian a sawi a. District zawng zawngah Old Age Home siam thuai a nih tur thu a sawi bawk.
Fitness trainer K Lalbiakzuala chuan upate tana insawizawi pawimawhna sawiin, ‘Cardio exercise’ tih dan a zirtir a. Aizawl Law College asst. professor Lalremruati’n upate chanvo leh dikna venhimna dan – Maintenance and Welfare of Parents and Senior Citizens Act 2007 a zirtir. “Cyber Crime & Fraud” tih thupui hmangin Cyber Crime sub inspector John Vanlalruata Sailo chuan social media leh technology hmanga inbumna awm theite laka inven dan a zirtir bawk.
RRTC for senior citizens hi Ministry of Social Justice & Empowerment hnuaia awm a ni a. Mission Foundation Movement chu project implementing agency niin Mizoram, Arunachal Pradesh, Meghalaya leh Assam an enkawl mek a ni.
District tinah Old Age Home
