US Open 2023 khelh chhunzawm zel a ni a, las 16 khelh zawh niin, quarter-final lut hriat kim a ni tawh. Thawhtan zing khan player ngaihven hlawh Novak Djokovic chuan awlsam taka hnehna changin quarter-final a lut. Djokovic hian tualchhung tlangval Taylor Fritz a hmachhawn zui leh ang.
US Open-a vawi thum champion tawh Djokovic hian US Open a hmachhawn hmasak ber tuma khel tha nghal tak Croatian qualifier Borna Gojo a hmachhawn a, kum 25 mi lakah harsatna lian a tawk lo va, darkar hnih leh minute 26 chiah a mamawh.
Third round-ah dinhmun der-thawng taka ding hman Djokovic hian last 16-ah bul a tan tha a, set khatnaah game hnih chiah a hloh. Awlsam takin set khatna la bawk mah se set hnihnaah inkhel hautak a hmachhawn a, Bojo a khel tha ta viau. Inkhel hmuhnawm takah Serb hian break pawimawh tak a nei a, game nga hloh chungin set a la. Set thumnaah pawh an inkhel tawk leh viau a. Djokovic-a’n break vawi khat a neih a chhawr tangkai a, game li hloh chungin set a la zui leh a. Borna Bojo lakah 6-2, 7-5, 6-4 a hnehna changin quarter-final a lut ta a ni.
Quarter-final-a Taylor Fritz hmachhawn leh tur Djokovic hian US Open-ah quarter-final vawi 13 a luhna a ni a, US Open mipa lamah quarter final lut hnem pahnih Roger Federer leh Andre Agassi record a nihrual. Federer leh Agassi record a nihrual bakah hian Flushing Medows-ah zana chak tam ber ni nghalin, zanah bik vawi 37 zet a chak tawh.
Djokovic laka fiahna hautak hma-chhawn tur Taylor Fritz hian pathianni zana a khingpui Swiss qualifier Dominic Stricker chu 7-6 (7-2) 6-4 6-4 in a hneh a, quarter-final a lut. Quarter-final-ah fiahna hautak a hmachhawn zui leh a ngai dawn a. A khingpui tur Novak Djokovic nen vawi sarih an in hma-chhawn tawhah Fritz hian chak a la nei miah lo va, semi-final lut turin ni danga a tih theih ngai loh tiin, inlehthalna lian a thlentir a ngai dawn tihna a ni.
Pathianni zana inkhel dangah American player pahnih Frances Tiafoe leh Ben Shelton ten hnehna changin quarter-final an lut ve bawk. An ni pahnih hi quarter-final-ah an inhmachhawn zui leh dawn a. Taylor Fritz-a’n Djokovic a lo hneh hlauh a nih bawk chuan USA player pakhat talin final an lut thei dawn a. Kum 2003 hnua a vawi khat nan tualchhung tlangval ngei US Open-ah champion leh theihna hun tha an nei dawn.
Tiafoe hian a khingpui Rinky Hijikata chu set hloh lovin a hneh a. Ben Shelton hi set khat hloh chungin Tommy Paul lakah hnehna a chang ve thung.
Djokovic a chak awlsam
