Wimbledon 2024 khelh mekah dam chiang lo chunga inlan Novak Djokovic a chak zel a, fourth round a inhlangkai. Djokovic hian inrinni zana a khingpui Alexei Popyrin lakah set a hloh hmasak zet hnuin set thum a la zawn a, Holger Rune hmachhawn leh turin a chak.
Wimbledon-ah vawi sarih ngawt champion tawh Novak Djokovic hian a khup a tina a, French Open a hmachhawn tluan thei lo. Wimbledon a hmachhawn thei dawn em tih a chian lo reng hnuin inelna a hmachhawn a, third round a paltlang ta hial. Inelna neih mekah a champion thei a nih chuan he inelnaa champion ngun ber Roger Federer record a nihrual ang.
Serb hian Centre Court-a khingpui Australia player Alexei Popyrin lakah bul a tan tha lova, a serve a hum zawh loh tuarin set khatna chu game li la chungin a hloh. Set hmasa hloh bawk mah se a insiamtha thuai a, awlsam pangngai taki set hnihna a la. Set khat ve ve an lak hnuin an inhnehtawk zui viau a, Nole hian break a neih a chhawr tangkai a, set thumna a la zui leh. Set lina hmuhnawm takin an khel a, tie-break khelh a ngai hial. Tie-break-ah tawnhriat ngah zawk Djokovic a chungnung zui leh a, Alexei Popyrin lakah hian 4-6 6-3 6-4 7-6 (7-3) a hnehna changin fourth round a lut.
Inrinni zana inkhel dangah rawlthar langsar Holger Rune chuan a khingpui Quentin Halys chu harsa takin a hneh a, Djokovic hmaa ding turin fourh round a lut.
Denmark rawlthar Rune hian Halys lakah bul a tan chhe viau a, set khatnaah game khat bak a la thei lo. Chiang taka set a hloh hnuin pawhin a insiamtha thei mai chuang lo. Set hnihnaah tie-break an khel a, hnufual zawkah tangin set a hloh zui leh. Set hnih a hloh vangin a dinhmun a derthawng hman viau. Dinhmun derthawng takah ding mah se a insiamtha a, set thumnaa break a neih a chhawr tangkai a, set a la. Set linaah an inhnehtawk zui leh viau a, tie-break khelh a ngai leh. Tie-break-ah Rune a chungnung leh hram a, tlawm a pumpelh. 2-2 a nih hnuin Rune a chetha zui ta viau thung a, set nganaah game khat chiah a hloh a, a khingpui lakah hian 1-6, 6-7 (4-7), 6-4, 7-6 (7-4) 6-1 a hnehna changin fourth round a lut ta a ni.
Mipa lama player langsr Daniil Medvedev leh Alexander Zverev te pawhin hnehna changin fourth round an lut ve bawk.
Djokovic a chak zel
