Nilaini khan Australia Open 2026 quarter-final khelh zawh a ni a, vanneihthlak taka hnehna changin Novak Djokovic chuan semi-final a lut. Djokovic hian semi-final-ah fiahna hautak a hmachhawn a gai dawn a, champion lai Jannik Sinner nen final luh an inchuh dawn. A lungthu kim nan Melbourne Park-a champion tum Sinner hmachhawn hi Djokovic tan thil chakawm loh tak a ni ang.
Djokovic a vannei tluang zel
Australian Open ah vawi 10 zet champion tawh Novak Djokovic chu Grand Slam-ah vawi 25 champion tlin a tumna kawngah a vannei tluang zel a, hahdam takin semi-final a inhlangkai. A vanneih chhoh dan ngaihtuahin Nole hi a champion kum a nih mai a rinawm hial a. A tana hun ruat a thleng dawn pawh a ni mai thei.
Chhuak hmasa lama kan tarlan tawh angin Tennis player ropui ber Djokovic hian fourth round-ah Jakub Mensik hmachhawn tur a ni a. A khingpui tur hi hliam vanga a inhnuhdawh vangin inkhel hah miah lovin Nole a chak a, quarter-final a inhlangkai. Quarter-final-ah set hnih hloh zawnin, dinhmun chhe takah ding bawk mah se hliam vang bawkin a khingpui Lorenzo Musetti chu hliam vangin a inlan tluan leh thei lo a, chau chhe lutuk lovin semi-final a lut leh nawlh bawk. Thiamna ril tak nei bawk mah se a tha a thum tawh vangin Djokovic hian thahrui ngah, fit leh thiam tel bawk si Jannik Sinner leh Carlos Alcaraz te a hneh hleithei tawh meuh lo. Inelna neih mekah erawh hahdam zawkin semi-final a lut a, Sinner leh Alcaraz hneh thei turin inrintawkna sang zawk a neih ngei a rinawm.
Djokovic hian quarter-final-a a khingpui Lorenzo Musetti lakah bul a tan tha a, break a nei nghal. 2-0 in hmahruai hman mah se a serve a hum zo lo zui a, Musetti-an 2-2 in a nihrual thuai. A serve a hloh zawn vangin dinhmun chhe zawkah a ding zui a, break let tum viau mah se a khingpui a break thei tawh lova, game li la chungin set hmasa a loh.
Set la hmasas zawk a nih vangin Musetti a phur viau a, set hnihnaah a khel tha zui viau bawk. Set hnihnaah Musetti hian Djokovic a break nghal a, a hnuah break nei zui lehin game thum chauh a hloh a, set a la nawn leh. Set hnih a lak zawn bakah a khelh that em vangin Musetti hian semi-final a hnaih hman viau tawh a, chak ngei tura ngaih a ni.
Set hnih a hloh zawn hnuin Djokovic-an medical time-out a la a, a ke na tuam that a ni. Medical time-out a lak hnua hlauhawm thar thin Djokovic kha la ni reng a, ni dang ang bawkin a hlauhawm thar leh. Set thumnaah bul a tan tha viau a, a khingpui a break nghal. Set thumna tir lamah Musetti chuan hliam vangin ngai a awh lo tan a, enkawl zui a ni. Inkhel hmachhawn zui leh mai bawk mah se game thum a hloh hnuin a inlan zui thei ta ngang lova, player ropui Djokovic lakah 6-4, 6-3, 1-3-a hma a hruai laiin a inhnukdawk a, uiawm takin semi-final a lut zo ta lo.
Musetti laka a chak dan chu a vanneih tawntaw vang a nih thu Djokovic chuan a sawi a. Inhliam lo se Musetti chu semi-final lut tur zawk a ni a, atan chak ngaihna a awm loh thu Djokovic hian a sawi tel bawk. A vanneih tluan em vangin Djokovic hian inrintawkna sang zawk nen Sinner a hmachhawn ngei ang.
Sinner a chak zel
Vanneihthlak taka Djokovic a chak lai ian Australian Open-a vawi hnih champion zawn tawh Jannik Sinner chuan Ben Shelton lakah harsatna lian tawk lovin hnehna a chang a, Novak Djokovic hmachhawn turin semi-final a lut ve bawk.
Grand Slam-a vawi li champion tawh Sinner hian a khingpui Shelton a ngam viau a, champion lai niawm rengin a khel tha. A khingpui hi 6-3 6-4 6-4 in a hneh a, semi-final a inhlangkai. Australian Open-ah vawi thum champion zawnin lungthu kim a ngai dawn a. Lungthu kim thei turin vawi hnih chak chiah a mamawh tawh. A khelh that chhoh em vangin champion nawn leh turin rin a kai hle nghe nghe a ni.
Sinner vs Djokovic
Semi-final-ah Jannik Sinner leh Novak Djokovic te inhmachhawn tur hi an hming a lian dun viau naa chak tura rinkai zawk chu Sinner a ni chiang viau thung. Anni pahnih hi vawi 10 an intum tawh a, Sinner hian vawi ruk hnehna a chang tawh a, Djokovic-an vawi lo hnehna a chang ve tawh thung. Exhibition match nen phei chuan an intum hnuhnung vawi sarih ah Sinner hian vawi ruk ngawt hnehna a chang a. Thahrui nei tha, thiam bawk si Sinner hi uaithla lam tawh Djokovic hian a chelh meuh ta lo a ni ber mai e!
Djokovic a vannei tluang zel
