Djokovic tan Olympic gold hmin ta nge nge..

Djokovic tan Olympic gold hmin ta nge nge…
Pathianni zan Olympic tennis men’s singles final-ah rinkai nep zawk ni chungin Novak Djokovic chuan Roland Garros-ah Spaniard Carlos Alcaraz hnehin Serbia tan Olympic gold a hlawhchhuak ve ta nge nge e.
Mipa tennis inelna huanga trophy lian dang lak tur awm thei zawng zawng hui fai vek tawh chungin Djokovic hian Pathianni hma zawng khan Olympic gold medal a la hlawhchhuak zo tlat lo a, mipa tennis player piang chhuak tawh zawng zawng zinga ropuiber ang hiala ngaih ngheh ni viau tawh mah se Olympic gold hian chu chawimawina nopui hlan chu mi thenkhat rilruah a la titim deuh niin a lang a, mahse, vawinga zet a beih hnuah Olympic singles gold medal a awrh ve ta nge nge a, hnehna a chan hnuah a hnehna sualchhuah chu a career-a hlawhtlinna lian ber tiin a sawi nghe nghe!
Kum 37-a upa ni ve tawh Serb hian thla riat chhung teh meuh eng trophy mah a lak loh hnuin Spain gold medal beiseina lian Alcaraz lakah 7-6(3) 7-6(2) hnehna a chang a, tuntum Roland Garros-a Olympic match ruk a khelhah set khat mah hloh loin gold a awrh!
Kum 1988-a tennis inelnain Games a luahkirleh hnuah Serb Djokovic hi Olympic singles title la thei upaber niin, Wimbledon final-a Alcaraz a hneh loh hnu ni 21-na chiah leh a khup zai a tawh atanga thla hnihna lekah Spaniard star rawn chhuak thar laka Wimbledon tlamwna chhangletin tennis player ropui chungchuang bik a nih nemnghehna title a sualchhuak ta a ni.
Top seed Djokovic khan amah aia kum 16 zeta naupang lakah a career-a a khelhthat berte zinga mi khelchhuak theiin, singles Grand Slam title chi hrang pali la kim vek chunga Olympic gold medal awrh bawk thei pangana chiah a ni.
Tennis-a mi bikte chauhin chawimawina ropui ‘Golden Slam’ an tih mai lo hlawhchhuak hmasa dang palite chu Rafael Nadal, Serena Williams, Andre Agassi leh Steffi Graf-te an ni.
Chuti ang mi chuan a Olympic zinkawng thui tak thlirkirin, “Ka Olympic Games hmasaber (2008)-ah khan bronze medal ka awrh a, kha mi hnu khan medal ka dawng thei ta hlek lo a, Games vawilia ka hmachhawn lehah vawithum zet semi-final lut mah ila chu bangpui chu ka pel zo tlat lo.
“Ti chuan, tuna kum 37 ka lo ni ve ta a, tun dinhmuna khawvela player tha bera chhal ngam, kum 21 mi lek lehnghal, a indawta Roland Garros leh Wimbledon title la chhunzawm zat thei, awihawm loh tennis ropui khel mek laka hnehna chan hi ka career-a hlawhtlinna lian ber ka ti lo thei lo,” a tichhuak ve hial a ni.
Serb hian Beijing 2008-ah khan singles bronze dawngin, London 2012-ah palina a ni a; kum 2016 Rio-ah khan hma takah tlain, kum thum liamta Tokyo-ah khan bronze-medal match-ah a tlawm bawk.
24-time Grand Slam champion hian Alcaraz hmakhalh tur khan kumina a la phak ngai loh a tennis khelh dan level thulkhung ngei mai kha a hun takah a rawn phawrh leh chaih a, darkar thum dawn inbeihna hautaka hnehna a chang zet kha chu court chhungah a tap vawng vawng a, chu tah thochhuakin mipui lama a nupui Jelena leh a fapa Stefan telna a chhungte leh a team kuah turin a chechhuak zui ta a nih kha…
Serbian flag vai chunga tawiawmtute zingah a fanu Tara pawh sawihmaih theih a ni lo ang a, ani hian ‘Dad is the best’ tih thuziak chuanna a lekchhuak va nghe nghe.
“Vawin thlen hma zawng kha chuan London-a 2012 opening ceremony laia Serbian flag ka ken kha infiammi ka nihna zawna ram tana ka tih theih sangber niin ka hre thin. Tuna mi zet hi chuan ka lo suangtuah thin zawng zawng kha a rawn luahlan zo ta vek a ni,” tiin ram tana gold medal lak a ngaihhlutzia Djokovic chuan a sawi.
Mittui tla chungin Djokovic-a ropui vawrtawp thlirliam mah se Spaniard la naupang tak Alcaraz khan a Olympic debut-ah silver medal a awrh thei a, kalbo hnai tawh Serb mi ropuite awm loh hunah a vanglai a herchhuak chauh dawn emaw a ni ang a, Olympic champion a nih zat tur sawi theih a ni lo!
Zirtawpnia Felix Auger-Aliassime of Canada hnehtu Italy player Lorenzo Musetti chumipa singles bronze medallist a ni.
Italy nulate’n women’s doubles gold awrhin, Sara Errani leh Jasmine Paolini tangdun chuan seeded third ni chungin Paris 2024 final an lut a, neutral banner hnuaia inlan Russian pair Mirra Andreeva leh Diana Shnaider lakah set hmasaber hloh zet chungin 2-6 6-1 10-7 hnehna an sualchhuak a; Wimbledon finalist Paolini leh doubles world number one hlui Errani lakah tlawm mah se Andreeva leh Shnaider kha Paris 2024 kal laia Russian infiammite zinga medal dawng hmasaber an ni.
Spanish pair Cristina Bucsa leh Sara Sorribes Tormo chuan bronze-medal match-ah 6-2 6-2-in Czech Republic aiawha ding Karolina Muchova leh Linda Noskova an hneh ve bawk.