Document lem hmanga sawrkar hnuaia dental surgeon hna thawk chu damdawi in pathumah thla khat chhung leka sawnkual vel a ni tih ZPM chuan sawiin, he thilah hian politician thil tithei tak hmelhriat an inrawlh ngei an ring tih an sawi.
ZPM Tuirial Constituency thuchhuak chuan, MZP-in ha dcotor hna thawk zingah document lem hmanga hna hmu an hriat chhuah hnuah, an ngenna angin Health minister chuan a bawhzui a, he doctor hian banna a thehlut a, a chhawrtu National Health Mission (NHM) pawhin a pawm zui nghal tih sawiin, MZP leh Health minister hmalakna chhuanawm an tih thu a sawi.
NHM director-in office order-a a banna lehkha a pawm atanga a lan danin, 2023 July 10 khan Thenzawl damdawi in atangin Tuirial biala Kawnpui PHC-ah dental surgeon hna thawk tura sawn a ni a. Kawnpui PHC-ah hian a hna a zawm hma hauhin Lungdai PHC-ah dental surgeon thawk lai reng awm chung siin, 2023 July 17 khan Lungdai PHC-a thawk tura tihna order a chhuak leh a, hei erawh mipui leh khawtlang hruaitute nawrna avangin tihpuitlin a ni ta lo tih a sawi.
‘Document lem hmang tih hrereng chung si a, Tuirial bial chhungah zalen taka damdawi in pahniha thlakhat chhunga transfer order nei thei hi chuan politician zingah thiltithei tak hmelhriat an nei ngei ang tih a rin theih a; qualified a ni lo tih pawh an hriatpui ngei ang tih kan ring tlat a ni,’ tiin he dental surgeon hi Tuirial bialtu MLA K Laldawngliana farnu fa a ni tih a sawi a ni.
‘Hetianga mipui nunna leh hriselna nghawng thei Tuirial bial chhunga dah a ni hi bial mipui min zah lohna leh ngaihthahna lian tak niin kan ngai a. He thil duhawm lo tak kan huamchhung damdawi ina a thleng hi pawmzam mai harsa kan ti a, a thlen theihna tura hna lak kawnga inhnamhnawih leh hriatpuitu an awm a nih chuan, thuneituten chhuichhuak ngei se kan duh,’ ZPM thuchhuah chuan a ti.
Document lem hmangtu ha doctor transfer danah thiltithei an tel ring
