Manipur Chief Minister Yumnam Khemchand Singh-a chuan Inrinni khan Kuki pawl eng emaw zatin an boycott chungin Kuki tamna, Churachandpur district a tlawh a, BJP MLA Vungzagin Valte-a hun hnuhnung a hmanpui.
Singh-a hian nawrh huaihawt leh kawngpui dan karah helicopter hmangin district hi a pan a. May, 2023-a Meitei leh Kuki-Zo inkara buaina a chhuah hnua chief minister-in Churachandpur a tlawh hmasak ber a ni.
Chief minister chuan Valte chu ‘mi rilru tluang tak’ tiin a sawi a, kum 2017 atanga Manipur Assembly speaker a nih atanga an inzawmna tha tak chu a sawi thar leh a ni.
May 4, 2023-a pawikhawihna thleng chungchang sawi chhuakin Singh-a chuan, “Ka pawi tih ber chu kha chawhnu hunah khan a bulah awm ila chuan kha thil kha thleng a thleng lo vang,” a ti.
“Vawiin hian ka thianpa, Pu Valte zahna hnuhnung ber hlan turin hun rei vak lo tlawh turin ka lo kal a, he hmuna ka tel thei hi ka tan chuan chawimawina ropui tak a ni a. Valte chhungte hi ka chhungte ang an ni a. A thiante leh a hnaih berte pawh hi ka thiante an ni bawk a. A tulna a awm hunah chuan an tanpuina eng pawh ka pe zel ang,” a ti.
Kum 61 mi, Thanlon bial atanga BJP legislator, N Biren Singh-a kaihhruai sorkar hmasaa Zomi hnam atanga minister lo ni tawh, Valte hian May 4, 2023-a Imphal-a mipui beihnaah hliam na tak a tuar a, kum hnih dawn enkawl a nih hnuah kumin February 21 khan Gurugram-a Medanta Hospital-ah a thi a, beih a tawh hnu hian wheelchair-ah hun a hmang ta char char a. A chhungte leh Kuki-Zo pawl hrang hrangte chuan thla tam tak chhung chu a vuina hi an nei duh lo va, pawikhawihna thlenga mawhphurtute man an phut a ni.
“A chhungte hian a tawpah chuan hal an rel ta a, a chhan chu MLA nupui a dam loh vang leh a pasal hi vui a duh vang a ni a. Thla tam tak chhung chu tualthah thubuaiah hian police-ten tumah an man loh avangin ruang hi ruang dahna hmunah dah a ni,” tiin an chhung zinga mi pakhat chuan a sawi.
Valte hi hnam inkara buaina a chhuah hnua tlangram hmunte tana ‘inawpna hran’ siam phuttu Kuki-Zo MLA 10 zingah a tel a. Chief minister hlui, N Biren Singh-a adviser hna pawh a lo thawk tawh bawk.
Chief minister-in a tlawh hma hian Kuki pawl lian, Kuki Inpi Manipur (KIM) chuan chief minister chu Churachandpur-a zin lo turin a ti a, district chhunga thil awm dan chu ‘boruak sang leh chhe mai thei’ a la nih thu a sawi.
Zirtawpnia Kuki civil society organization (KCSO) parukten thuchhuah intawm an siamah, “KCSO Churachandpur chuan chiang takin a sawi duh a, ‘Kuki-Zo-Meitei buaina’ kal mek hi chin fel a nih hma chuan kan district-ah Meitei mi, official emaw, pawl emaw, chief minister pawh ni se, kan phal lo ang,” an ti.
Pawlte hian ‘a tlawh avanga thil tha lo a chhuak a nih chuan a mawhphurhna a ni ang’ tiin an vau bawk.
A hnuah chanchinbumite nena an inkawmnaah chief minister chuan Manipur-a remna siam thatna tur kawng awmchhun chu inbiakna a nih thu sawiin, state pum hmasawnna atan remna nghet neih a pawimawh thu a sawi.
Inrinni khan nawrh huaihawttu pawl pakhat chuan Kangpokpi district-ah sikul bus an tiding niin thuneitute chuan an sawi.
An sawi dan chuan Ex-Servicemen Colony bulah zing dar 7.30 vel khan a thleng a, zirlai 30 phurin Kendriya Vidyalaya, Leimakhong, Kangpokpi district pan bus chu Kuki kawngz awhin an dang a ni.
Kuki-te hian NH-2-a zalen taka kal theihna tur leh May 13-a Kuki firfiakten an thah nia sawi, Naga parukte chu dikna chanvo pek an phut a ni.
Dodalna leh vauna karah Kuki MLA Valte vuinaah CM tel
