Season thar atana inbuatsaihna club friendy-ah English Premier League club lian pahnih Manchester United leh Manchester City te an khingpui hneh lovin an tlawm ve ve. United hian Borussia Dortmund an hneh lova, City in Atletico Madrid an hneh lo ve bawk.
United an tlawm zawn
Premier League club lian Manchester United hian Allegiant Stadium, Las Vegas, Nevada, USA-ah German club lian Borussia Dortmund an hmachhawn a, goal thun hmasa zawka an tan zet hnuin tlawm zawkah an tang. United hi Real Madrid lakah an tlawm tawh a, Dortmund hneh lovin an tlawm nawn leh.
United hian German club lian Dortmund lakah bul an tan tha a, minute 22-naah Diogo Dalot goal thun hmangin hmahruai zawkah an tang. Goal thun hmasa zawkah an tang vangin inrintawk takin inlan zui mah se goal an thun belh thei mai lova, chawlhlawk hmain hnufual zawkah an tang hman. Minute 43-naah Borussia Dortmund tan Donyell Malen chuan goal thunin an si phurh a sut a. An goal khatna a thun atanga minute khat pawh a liam hmain Malen hian an goal hnihna a thun belh zui leh nghal zat a, 2-1 a hmahruai chungin chawlhlawk an hmang.
Chawlhlawk hnu lamah United in bul an tan tha nawn leh a, goal thum hmasa zawkah an tang leh. Minute 52-naah Antony chuan goal thunin an si phurh a sut. 2-2 a nih hnu hian inkhel a hmuhnawm zui viau a, team hnihten goal thun tumin tan an khawh dun nasa hle. Goal thun tuma an innawr tawn chhen hnuin German club bawk che fuh hmasaah an tang nawn leh a, minute 71-naah Youssoufa Moukoko chuan hma an hruai nawn lehna goal a thun. He goal hi hun tawp thlengin an venghim a, English club lian lakah hnehna pawimawh tak an chang.
Borussia Dortmund an hmachhawn tum hian Inter Milan atanga an lak thar si nghak Andre Onana chuan second half-ah inkhel a hmachhawn a, a che vel a hmuhnawm hle. A ball pek a dik a, stoper tha a nihzia a lantir a, a ball vawrhchhuah a thain a fuh thei viau bawk. Onana hian United tan a khelh vawi hnihnaah hming a chher nghal hat a, chu chu a awm hmun dik loh em vanga an captain hlui Harry Maguire a ankhum chiam kha a ni. Maguire a an khum hian sawi zui a hlawh viau a, Maguire demna leh hralh tura nawrna titamtu a ni zui bawk.
Manchester United hian friendly match-ah club lian an ngam lo zawn. La Liga club lian Real Madrid lakah si hnih faiin an lo tlawm tawh a, German club Borussia Dortmund lakah an tlawm leh bawk a. Inbuatsaihna hun hmang tha lo tak chungin USA an chhuahsan a, Pathiani zan khian Dublin lamah Athletic Bilbao an hmachhawn zui leh ang.
USA lamah United in Borussia Dortmund an ngam loh laiin EPL champion Manchester City chuan South Korea lama an hmachhawn Atletico Madrid chu 1-2 in an ngam lo ve bawk.
Dortmund lakah United an tlawm
