Chief minister duh dan anga Department of Personnel and Administrative Reforms officer-ah “no sir” ti ngam an awm kha an sawrkarin a vanneihpui hle tih he department changtu hlui K Sapdanga chuan a sawi.
Zirtawpnia thuthar thehdarhtuten an kawmnaah zawhna chhangin minister K Sapdanga chuan, department chan inlaksak chu chief minister thu liau liau a ni a, midangin thurawn chu an pe thei a. An ni chu chief minister hnuaia awm an ni a, chang tawh lo se a tih chuan an chang lo anga, chang leh rawh se a tih pawhin an chang leh mai anga, midangin chang se a tih pawhin a pe thei tih a sawi.
A hma pawhin chief minister-in minister-te department chan siksawi sak a nei tawh a, tuna DP&AR a la ta pawh chu mak a lo ti hran lem loa, lak nat tur ni ah a ngai lo, tiin zawhna a chhang.
“DP&AR hi a hautak a, kan hotuten min ringin min enkawl tir ve a, sawrkar hnaa la lut ngai lo, ka thawh ve chhun pawh zirtirtu lam a ni a; office work hi zirchawp tak liau liaua luhchilh ka ni. Zawt chawpin kan thawk a, kan officer-te an fel a, party leh sawrkarin tih hlawhtlin kan tum – aikal lak tihtawp, office administration tih uluk deuh leh kalphung thar kan duante sawrkar officer-te zarah kan tihlawhtling thei a, an thlawpna ka dawng tha hle,” a ti.
DP&AR hna bik chu a huam a zau deuh a, department hrang hrang lo ‘analyse’ tu a ni, tiin, officer-te an fel a, dan an hria a, an chik peih bawk a, thurawn pawh an pe nasa a, dan anga thil tih tumin officer-ten dan hnuaia thil tih theih leh theih loh an sawiho thin tih DP&AR minister hlui ni ta hian a sawi. Ani’n ‘social’ leh ‘political’ taka rawtna a neih ve pawh dan behchhana thil tih theih loh chu officer-ten an sawi mai thin a. Court leh India danpuiin a phal loh, thubuai hlabuaia lak theih dan leh sawrkar tana khin hneh theih loh chhan tur chu, case awm tawh sa atangin an hrilh thin tih a sawi.
“Lawmawm em em ka tih chu, chief minister-in kan sawrkar tirha a sawi thin, ‘no sir’ ti ngam officer kan duh, a tih kha DP&AR ah hian ka hmu in ka hria a, chu vang chuan kum hnih leh a chanve ka enkawl chhung hian vanneihthlak takin DP&AR kaihhnawih sawrkar thutlukna siamah sawrkarin vawikhat mah law court a thleng loa, kan officer-ten min ven hneh tlat vang a ni. Tunhma chuan sawrkar hian cho a hlawh thin a, law court-ah an khing thla zung zung thin,” a ti.
DP&AR enkawl chu a hautak a, thiamna lamah pawh inchhiar zau a ngai em em a, tlin lo a inti hle thin tih a sawi a. Tunah chief minister-in a chang dawn chu, a ni chu mi rilru chak a ni a, a tlin pawh a tlin viau a ring tih a sawi.
DP&AR secretary thlak duhna avanga ZPM PAC atanga nawrna awm, ani’n a tih duh loh avanga department inlaksak hi thleng ta a ni em, tih zawhna chhangin K Sapdanga chuan, sawrkarin kalphung a nei a, chumi ang chuan an kal a ni mai a; chief minister nen hmaichhanah emaw phone in emaw an (DP&AR) officer-te chungchang vawikhat mah an sawi dun lo tih a sawi.
Party chhunga inlungrual lohna awm anga sawi chu chhangin, party tin chhungah ngaihdan hrang hrang a awm thin a, ruling party ah phei chuan a awm tam thei a, rorel lai nih chuan a langsar ta bik thin tih a sawi. “Ngaihdan inang lo, tihah hi chuan chhungkuaah pawh, nupa karah pawh ngaihdan inan loh chang a awm a, chuvanga darh vek leh inthen duhna khawp hial emaw a awm tihna a ni lo,” a ti.
Chief minister ni tura tun sawrkar namthlua ruling party MLA leh opposition MLA te nen sawrkar siam tura thawhho puia sawmtu emaw an awm em, tih zawhna chu, mipuiin ZPM party chu kum 5 chhung an rawng bawl turin an siam a, member 27 an thlangtling a, theihtawp chhuahin mipui rawng an bawl chho a, a hun lo laia chief minister nih tum chu thil kalphung ni ah a ngai lo hrim hrim tih a sawi.
“Mipui thlanchhuah MLA 27 kawih then emaw lam ka ngaihtuah ngai loa, a tulna pawh ka hre lo. Sawrkar lakluh ni a chief minister-in ni 100 chhunga tihhlawhtlin tur a tihte, department tin hnathawh min thlirlet pui thinte hi tha ka ti. Party dang sawrkar lai pawhin thuthang leng vel chu a tam thin. Keimah atang chuan chutiang zeldin thu ang a taka chantir tumna a awm lo,” a ti.
Party hruaitu thlan an hnaih a, inchotuah leh infuihpawrhna lam a tam tih K Sapdanga hian a sawi a. Chief minister-in party president leh chief minister nih kawp a thlawp loh thu a sawi chu, ZPM din hma, Zoram Exodus Movement an nih lai atang tawha an lo aupui, ZPM din hnu pawha campaign laia an lo sawi uar em em a ni tih a sawi.
DP&AR officer-ah ‘no sir’ ti ngam an awm kha kan vanneihpui a ni – K Sapdanga
