Chief minister-in K Sapdanga kut atangin DP&AR a la a, chumi hnuah commissioner/secretary sawn a ni.
June ni 25 khan DPAR-in office order an siam a, IAS officer panga sawnna niin, DP&AR leh UD&PA commissioner/secretary K Lalthawmmawia chu school education leh sports & youth services department te chang tura sawn a ni.
Tun hnaia sawi hlawh tak DP&AR hi cooperation/DM&R secretary ni mek Udit Prakash Rai-a’n a chang ang.
DP&AR secretary thar hi IAS 2007 batch a ni a, AGMUT cadre a ni. 2023 khan ministry of home affairs-in a lo suspend tawh a, chhui mek a nih thu te social media lamah a sawi zui a ni.
DP&AR department chungchang hian thla hmasa lam atang khan poltics titi a luah reng a, tuna commissioner/secretary an thlak hnuah pawh titi a la awm zel. Sorkar ding lai an sorkar hnu lawk atangin an party rorelna sang PAC-in DP&AR chungchang hi an ngaihtuah tawh tih tun hnaiah a sawi a, K Sapdanga kut atanga a la pawh PAC rorel a nih thu a sawi bawk. Minister an thlak hnuah commissioner/secretary an thlak ta a, titi kal lai a chhawm nung niin a lang.
Mi dang pathum- V Lalsangliana, Vivek Kumar Tripathi leh Sushil Singh te pawh sawn an ni.
V Lalsangliana hi PWD leh UD&PA department commissioner/secretary a ni ang a, Vivek Kumar Tripathi hi social welfare director a ni ang a, Sushil Singh hi DM&R special secretary (independent charge) a nih bakah Aizawla awm chungin Mizoram House, Delhi-ah special resident commissioner a ni ang.
DP&AR secretary sawn ta
