DR Congo-a Ebola leng thar lehah mi 15 thi

Democratic Republic of Congo-a Ebola leng thar leh avangin mi 15 vel an thi leh tawh niin an ram health ministry-in a sawi.
Hri kai an awm leh tih hi thla hmasaa nu nau pai lai kum 34 mi damdawi ina dah luh, Ebola kaite awm dan ang taka awma khawsik sang tak neia luah reng mai atangin an finfiah tih ministry chuan a sawi.
A taksa peng eng emaw zatin hna a thawh tawh loh hnu lawkah a thi zui a ni.
Tun tum hi Africa khawmualpui laili ram zau tak, damdawia inenkawlna that lohna hmun leh khawchhak lama tual chhung buaina tamna ramah a len vawi 16-na a ni tawh a ni.
Tun tuma leng leh hi an ram lailia Kasai province-ah a ni a, mi 28 vel kai rinhlelhawm an hmu tawh tih ministry chuan a sawi.
Thuneitute chuan a darh zel lohna turin inkhuahkhirhna khauh tak an kalpui a, heng zingah hian uluk taka kut sil tur leh a len darh mai a hlauhawmna hmuna mi dang nena inhlata awm tura tihna a tel.
Endiknaah chuan Ebola leng mek hi Zaire a ni a, natna vâng tak niin thihpui a awlsam em em thung niin thuneituten an sawi.
Thi 15 zingah hian damdawi ina thawk mi pali an tel tih an sawi bawk.
“Inkai darh mek zel a nih avangin a kai hi an la pung zel dawn niin a lang a. Response team leh tual chhunga thawk team chuan a kai thei awm deuhte dap chhuakin damdawia enkawl zung zung turin hma an la a, a rang thei ang bera himna tura hma lak nghal a ni,” tiin WHO chuan thu a chhuah.
DR Congo chuan ‘a enkawlna damdawi an ngah tawk’ tih sawiin Ervebo vaccine pawh dose 2,000 chuang an nei tih an sawi a, ‘hetiang chi Ebola hi a venna hmanruain a veng tha hle a ni’ tih WHO chuan a sawi bawk.
DR Congo-a Ebola a len hnuhnung ber chu kum thum kal ta kha niin mi paruk an thi.
Kum 2018-20 chhunga leng kha thi an tam ber tum niin mi 2,000 chuang an thi.
He hri hi fruit bat an tih atanga darh niin hriat a ni a, kum 1976 khan Ebola River bul, tuna DR Congo-a mi bulah hian hmuh hmasak ber a ni.
Miin a kaite vun an tawh emaw, an ka leh hnar atanga tuiril chhuak te, an thisen, luak, thlan leh taksa atanga tuiril chhuak kai atangin awlsam takin inkaichhawn theih a ni.