Mizorama science NGO upa ber, Mizoram Science Society chuan a vawikhatna atan Dr LN Tluanga, Mission Veng hnenah ‘Science Award’ a hlan.
Mizoram Science Award hi Mizo zinga science leh a kaihhnawih lama khawtlang leh ram tana hnuhma nei tha, scientific research lama mi hmingtha leh thawhhlawk hnena hlan thin turin Mizoram Science Society(MSS) hian a duang a. A dawng hmasa ber atan Dr LN Tluanga hi thlan a ni. He award hian sumfai Rs. 50000 a kengtel.
Award dawngtu Dr LN Tluanga hi a taksa a chak loh deuh avangin Aizawl Hospital-ah enkawl mek a ni a, chawimawina pawh hi damdawi inah hian MSS hruaituten an hlan a ni.
Dr LN Tluanga hi kum 1933-ah Bukpui khuaah a piang a, Sialsuk leh Aizawlah lehkha a zir. Scottish Church College atangin 1955 khan BSc a zo a, mathematics subject-ah distiction-ah a pass. BSc a pass hnu hian sikulah kum khat thawkin MSc a zir chhunzawm a, kum 1974 -ah Gauhati University hnuaiah PhD zoin Mizo zinga mathematics subject-a PhD nei hmasa ber a ni. Mizoram sawrkar Education director hmasa ber niin, a hnu lamah Education department-ah vek hian consultant /adviser a ni bawk. Science tih hmasawnna kawngah nasa taka thawktu niin, Mizoram Science Society hi ama hoa kum 1979-a din a ni.
Dr LN TLuanga hnenah Science Award
