Dungtlangah Vangpui Kut hmang
Art & Culture department leh YMA Dungtlang Branch tangdun buatsaih ‘Cultural Meet leh Vangpui Kut’ chu Nilaini khan Dungtlangah neih a ni.
Kut hmanpuitu Art & Culture minister C Lalsawivunga chuan Vangpui Kut chu Mizo culture vawnhim nana thil pawimawh tak a ni a, mahni hnamzia zahpuite chu hnam dingchhuak an awm ngai loa, an ral thin tih a sawi. Vangpui Kut hmangtute chu kan culture vawngnunga tih hmasawn tum theuh turin a sawm a, aia upa zah leh tlawngngaihna tlahniam nia sawi mek chu tinung thar leh tura tan lak a pawimawh a, mi harsa zawkte tanpuina kawngah theihtawp chhuah a tul tih a sawi a ni.
Dungtlang khuaa Vangpui Kut hmang tura sawm YMA Ramhlun North Branch-in Mizo hnamlam chi hrang hrang an entir a. YMA zaipawl bakah Ramhlun North MHIP ten hnam lam an entir bawk.
Dungtlang leh a chhehvel khaw hrang hrang – Sesih, Leithum, Lianpui, Khuangleng, Khuangthing leh Vaphai YMA Branch bakah school hrang hrangten Mizo hnamlam an entir a; YMA Ramhlun North Branch president Laldingliana Sailo chuan thu a sawi bawk.
Dungtlang khua Vangpui Kut hi kumtin hman thin a ni a, kumin hi tum 38 an hmanna a ni. Kum 2021 atang khan Aizawla YMA branch an sawm thin a, kumin hian YMA Ramhlun North Branch an sawm a, member 60 chuang an kal.
Dungtlangah Vangpui Kut hmang
