E-roll dik neih theihna atan
thawhpui turin party sawm
Mizoram chief electoral officer Madhup Vyas chuan Special Summary Revision of Photo Electoral Roll 2024 kal mekah political party hrang hrang aiawhte a thutkhawm pui.
CEO chuan political party-te chu electoral roll dik leh felfai neih theih nan thawhpuiah a sawm a. A bikin khawpuiah hmun khat aia tamah electoral roll-a hming chuang emaw hmun danga insawn tawh, an awmna hmasa electoral roll-a hming la awm emaw, mitthi tawhte electoral roll-a la chuangin inthlanpuia vote tlak dan percentage thlenga a nghawng theih avangin, heng hi a awm loh nan hma lakpui turin a sawm. Election Commission of India (ECI) duh dan angin electoral roll-a felfai leh felfai loh booth level officer (BLO) te enpui turin polling station tinah political party-te chu an aiawh booth level agent (BLA) ruat theuh turin a ngen bawk.
2024 January 6-a draft electoral roll tlangzarha a lan danin, Mizoramah voter 852087 an awm a; heng zinga 413063 chu mipa, 439024 hmeichhia an ni. Kum 80 chunglam voter 11194 leh PwD (rualbanlo) voter 3381 an awm a ni.
Special Summry Revision of Photo Electoral Roll 2024 atana ECI-in ruahmanna a siam ang chuan, January 6 khan draft electoral roll tlangzarh niin, dilna leh thlen duh nei tan hun hawn nghal a ni a, dilna hrang hrang thehluh theih hun chu January 22 thleng hawn a ni. Dilna lut hi February 2 hmaa ngaihtuah zawh hman tura ruat a ni a. Ruahman dan chuan electoral roll thar, final electoral roll chu February 8-a tlangzarh tum a ni.
E-roll dik neih theihna atan thawhpui turin party sawm
