Kumin February ni 28-a ZPM Party-a Vigilance Deptt-in Mizoram Governor kaltlanga Election Commission of India(ECI)-a Office of Profit dan bawhchhiaa Robert Romawia Royte an puhna chu ECI chuan a chingfel a, ni 14.11.2023 khan Judgement siamin Roberta’n thiam lohna a neih loh thu Order a tichhuak.
Thudawnnain a sawi danin, Mizoram Goveror pawhin ECI-in a hriattir angin ni 14.12.2023 khan Robert Romawia Royte thiam chantirna Order a tichhuak a, ECI leh ZPM party pawh a Order copy a pe ve ve.
Nimin vek khan Mizoram Chief Secretary pawhin Mizoram Governor thupek angin hemi chungchang hi Mizoram Gazzette (Extraordinary) ah a tichhuak bawk a ni.
ECI chuan Robert Romawia Royte hian NECS chu Business Transfer Agreement hmangin a fapa hnenah a neitu nihna a pek vek avangin NECS leh sorkar thawhhonaah Roberta hmer tel chu a dik lo tiin office of profit dan a kalh lo a ti a. Hekna points hrang hranga ECI ngaihdan/Opinion pawh ECI dan angin Mizoram Gazzette-ah chhuah a ni.
Robert Romawia Royte, Hachhek bialtu MLA chuan, “ZPM Party-in min hek avang hian tumah ka huat phah lo va, a sawina tur dik tak ECI ngeia complaint an submit pawh kha a puitlin thlak ka ti. Office of profit dan chungchanga thutawp siam theitu ECI-in thudik a rawn puang chhuak ta hi a lawmawm a, hemi avang hian Mizoten India danpui leh a hnuaia dan tesep nihphung dik kan hriat belh ngei ka ring,” tiin a sawi a ni.
ECI-in Robert Romawia thiam chantir
