CBI chu Mizoram mipuiin an hre bel sa a, ED an lo lang leh; anni pawh hi thil chhuitu pawl an ni a, Mizoramah an awm. Tunlaiin ruihhlo tawlh chungchang an chhui ngawrh hle.
ED hi Enforcement Directorate tihna a ni a, India sorkar hnuaia economic intelligence agency an ni. Tun karah Mizoram, Tripura leh West Bengal-ahte ruihhlo tawlh chungchang hi ngawrh takin an chhui a, an thil chhuina hi state hrang hrang ni mah se thil inzawmah an ngai.
Thawhtanni khan state pathuma an thil chhui hna hi an tan a, ruihhlo chungchang leh thil sual hmanga sum siamna lam an chhui a ni.
Nikum August ni 21 khan Narcotics Control Bureau te’n Tripura-ah ruihhlo tam tham tak, methamphetamine kg 49.101 leh heroin gram 40 an man a, chu chu tuna an thil chhui lai lo intan dan a ni.
June ni 8 khan ruihhlo hmanga sumdawng nia rinhlelh mi palite chenna in an dap a, an zingah hian Zokhawthara cheng Hmingthansangi a tel; ED lamin an sawi danin, ani hian bank-ah cheng vaibelchhe 33 a nei tih haichhuah a ni. Mi pang pahnih chu Tripura mi an ni, pakhat dang chu West Bengal mi a ni.
An thil chhuiah hian ruihhlo tawlhtute hi an chet nat hmel khawp mai a, ED lamin an sawi danin, ruihhlo tawlhtute hian CCTV camera 25 chuang an lo hmang a, chung chu ramhnuaia thing lerah te kamin, Tripura mi pahnihte chenna inah te an kam bawk. Bangladesh leh India inrinna pal (border fencing) velah pawh camera hi an lo kam tih an sawi.
ED-in ruihhlo tawlh chungchang chhui ngawrh
