Ei leh in hrisel leh thianghlim
neih theih dan tur sawikhawm
Health & Family Welfare minister Lalrinpuii chuan an department hnuaia food safety lam hotute koin mipui tana ei tur hrisel leh thianghlim chhawpchhuah kawnga hma lak dan tur a sawipui.
Mizoram mipui tlemte zingah natna hrang hrang – nerve thalo atanga cancer thlenga vei kan tamin, natna thlentu zingah ei leh in hrisel lo leh thianghlim lo chu a chhan bul pakhat a nih tel avangin food safety lamah nasa zawka hma lak tum a ni tih Health minister hian a sawi a. Mizoram-in food testing laboratory changtlung kan neih theihnan a hmun tur General Administration Department-ah dilna a thlen tawh a, a sakna tur bakah testing laboratory tha leh changtlung neih theihnan sum sawrkar laipuiah theihtawp chhuah tlan a tul tih a sawi.
Thawktu indaihlohna pawh hemi kaihhnawih sawrkar hotute sawipui thuai a tum tih sawiin, Mobile Food Testing VAN neih mek leh testing laboratory-a khawl neih ang ang pawh mipuiin tangkai leh tha zawka an hman theihnan hma la turin thawktute a chah a ni.
Food safety hotuten report pe in, thawktu indaihlohna avang leh testing laboratory changtlung neih loh avangin nasa zawka hma lak a harsa tih minister hnenah hian an thlen a. Tunhnaia FSSAI ranking-a Mizoram dinhmun hniam lutuk chhan pawh thawktu heng harsatna vang hi a ni tih an sawi bawk.
Ei leh in hrisel leh thianghlim neih theih dan tur sawikhawm
