FCS&CA minister B Lalchhanzova hoin Ningani khan eirawngbawlna gas tihchhingpen tih reh dan tur ngaihtuahin Supply department, Legal Metrology, IOC Ltd leh gas agency hruaitute an inrawnkhawm.Minister chuan sawrkarin mipui lakah ei leh bar kaihnawihah langtlang taka a kalpui a tul bakah mipuiin an chanvo diktak an chan theihnana hma lak chu sawrkar mawhphurhna a nih anga inkokhawm an ni tih a sawi.
Thutkhawmah hian Mizorama sem gas burah tui pawlh a tam thu leh Mizoram chhunga tih chingpen leh state pawn atanga chingpen saa rawn lut a awm nia a lan thu sawi a ni a. A tam zawk chu Mizoram pawn Cachar district-a khawih chingpen nia hriat a ni.
Cachar district thuneitute hnenah Kolasib district bawrhsap-in hma lo la tura ngen nise, Kolasib bawrhsap hi a huamchhungah gas tihchingpenna hmun nia sawite lo vai bawk se, tia rel a ni.
FCS&CA minister chuan mipui hnena gas thlentute chu IOCL an ni emaw distributor pawh nise, mipuiin gas buk tling, pawlh dal loh an dawn theihnan tan la a, inpawh tawn taka hma lak a tul tih a sawi a. Rinawmna leh dikna nen sumdawnna kalpui a tul tiin, IOCL pawh an system tha tawk viau ti mah se, tan la lehzual turin a chah.
Legal Metrology chuan helam hi endik thin se a duh tih a sawi a. IOCL-in thlatin agency tina gas an pek chhuah zat FCS&CA department-ah report thehlut tura tih a ni bawk.
Eirawngbawlna gas tihchingpen thin tih tawp dan ngaihtuah ho
