El Salvador gang-busting President Nayib Bukele chu hneh taka thlan tlin lehin a awm a, chutih rual chuan ‘dictator’ tia koh a hlawh tho bawk a, koh a nihna chhan pawh human rights bawhchhe nasaa puh a nih vang a ni.
Kum 42 chauha upa niin gang te laka indona tawp chin nei lo tia a sawi a kalpui chuan ram chhung leh pawnah fak hlawh hle thungin Latin America-a president zinga lar ber a ni hial awm e.
Mahse, parliament pawh military te a luhchhuah tir tawh a, tha lo nia a hriat judge te thlakin pawisawi lote lung inah a khung tiin amah sawiseltute chuan an sawi ve thung.
Mahse amah sawiselnate chu engahmah ngai lovin ganster nia hriat sing tel teh meuh a mankhawm tawh thung.
“Keini Salvadorans te hi second class citizen-ah min ngaiin thi mai turah min dah tihna em ni” tiin Western journalist ten an zawhna a chhang a.
“Heng gang-te hian kan chhungte an that a, kan fa pawisawi lote chu nangni liberal ideas te avangin an tihlum a ni,” tiin a sawi zui bawk.
Inthlan result puanah Bukele hian vote tla atanga 85% vel lawih hmuin democratic history a thlan tlin hneh ber nia ngaih a ni.
Bukele hi social media hmang nasa tak niin hmuihmul neiin tih thin dang pangngaia tie awrh leh presidential sash a inthuam tih vel aiin jeans leh baseball cap nen a awm mai zawk thin bawk.
Lione Messi nena an thla an lak dun te, United Nations General Assembly rostrum a a selfie te chu X, YouTube leh Facebook ah te amah ngeiin post in a fans maktaduai tel te nena inzawm nan bera a hman a ni.
“Amah atchilhna leh ngaihsanna turu tak a awm mek a ni” tiin analyst Michael Shifter, inter-American Dialogue thin tank, Washington a inbun chuan a sawi a. “Charisma leh communication skill a nei tha em bawk a ni,” tiin a sawi.
Palestinian heritage nei niin Bukele hi San Salvador-ah kum 1981 khan a piang a. Central American University atanga graduate niin a pa sumdawnna textiles, pharmaceuticals leh publicity te chu kum 18 a nih atangin a luhchilh tawh a ni.
March 2022 atang khan gang mankhawmna thawk tanin chutih rual chuan sawisel a tawh nasat phah a, human rights bawhchhiatna a kalpui nasa an ti ve thung.
Mahse nasa takin El Salvador a tualthahna a tlahniam thung si. “Murder capital of the world kan thlak dang lam a, khawvela ram hlauhawm ber chu tunah chuan Western Hemisphere a ram him ber a ni tawh,” tiin a sawi.
X-a a handel chu a thlak deuh reng bawk a, a hma chuan ‘dictator of El Salvador’ tih te hmangin a hnuah ‘world’s coolest dictator’ a inti leh a, tunah chuan ‘philosopher king’ a inti mek thung.
El Salvador president Nayib Bukele
