Electric hmun beia Trump-a vauna Iran-in chhang let

Electric hmun beia Trump-a vauna Iran-in chhang let
US President Donald Trump-a’n darkar 48 chhunga Iran-a electricity grid tihchhiata a vauna chu Iran chuan chhang let ve nghalin an tih vaih chuan phuba lak nan Gulf-a an thenawm ramte energy leh tui lakna a bei ve dawn tih a sawi.
Vantlang thil intihchhiatsakna a thlen chuan helai biala buaina hi a tinasa zual thei a, khawvel puma sumdawnna dinhmun pawh tichhe thei a ni bawk.
Pathianni khan zing atangin Israel ram pumah air raid siren a ri a, Iran atanga missile lut tur inralrin niin a hma zanah Israel chhim lama Arad leh Dimona khua beihna pahnihah zan khat chhungin mi tam takin hliam an tuar a ni.
Israeli sipaite chuan darkar engemaw zat hnuah a chhan let nan Tehran an bei niin an insawi bawk.
Trump-a chuan Tehran-in darkar 48 chhunga Strait of Hormuz a hawn loh chuan Iran-a power plant-te chu ‘tiboral’ a tum tih sawiin a vau va, hei hi indonain ‘zuai lam a pan’ tih a sawi tukah a sawi a ni a. US Marines leh hmanrawng dangte chuan he bial lam hi an pan mek bawk avangin hlauhawm thar a sia.
Electric hmunhma beih hi Iran chuan a tuar viau theih rualin Gulf-a a thenawm ramte tan pawh chhiatna nasa a ni thei dawn a, mi cheng let nga vela tam power hmang an ni hlawm a. Electric avangin an thlaler khawpuite chu chenna atan a siam ve mai chauh a ni a, mi tam zawk chuan tui in tur pawh a zawng zawng deuhthaw chu tuifinriat atanga lain electric hmangin an tithianghlim a ni.
Trump-a’n a vau hnu lawk Pathianni khan Iran-a sipai chak tak, Revolutionary Guards chuan khawvel puma tuialhthei leh liquefied natural gas phurh hmun ngaa thena hmun khat kalna kawng, an ram chhim lam tuipui kam lawng kawng chu khar a nih tur thu an sawi zui.
Guards chuan thuchhuah siamin, “Strait of Hormuz hi khar vek a ni ang a, kan power plant chhe tawhte siam that a nih hma chuan hawn a ni dawn lo,” an ti.
February 28-a US leh Israel-in indona an kalpui tan atang khan mi 2,000 chuang an thi tawh a, khawvel sumdawnna a tichhia a, tuialhthei man a sang a, khawvel puma thil man a san hlauhna a lian hle a, indo hnu hian khawthlang ramte inzawmna a chhe bawk.
US leh Israel tangdunin Iran an beih hnuah hian Tehran chuan Strait of Hormuz a khar a, kum 1970 chho hnua tuialhtheia harsatna nasa ber a thlen phah mek.
“Iran hian he hun atanga DARKAR 48 chhunga Strait of Hormuz a hawng kim lo a nih chuan United States of America chuan an POWER PLANT hrang hrangte chu a kap ang a, a tibo vek ang a, A LIAN BER AATANGIN TAN A NI ANG!” tiin Trump-a hian social media-ah Zirtawpni zan dar 07:45 (India-a zing dar 06:15) khan a tar lang a ni.
Iranian chanchinbute chuan International Maritime Organization (IMO)-a an ram aiawh thusawi tar langin strait hi ‘Iran hmelma’ nena inzawm lawngte tih loh lawng lian dang zawng zawng tan hawn a la ni reng tih an tar lang.
Ali Mousavi-a chuan Tehran nena venhimna leh himna atana ruahmanna siamte inremna siamin tuipui kaltlanga kal theih a nih thu a sawi.
Ship-tracking data atanga a lan danin lawng thenkhat, Indian leh Pakistan tuialhthei phurte chuan strait an kaltlang theih nan an inrem tawh a; lawng tam zawk erawh a la tang.
Iran-a Khatam al-Anbiya military command headquarters chuan Pathianni khan US-in Iran tuialhthei leh energy hmunhma a tihchhiat chuan he biala US energy, information technology leh an hmunhma dang zawng zawng an bei dawn tiin Trump-a vauna hi a chhang ve tawh bawk.
Iran power plant lian ber berte beih a nih chuan thim a thlen thei a, pump leh tuialhthei thlitfimna atanga thawn chhuahna hmun leh sipai command centre thlengin a tibuai thei a ni.